भुँइचालमे घाहिल हुइलके उपचार प्रदेश सरकार कैना

पहुरा समाचारदाता
धनगढी, १७ कुँवार । सुदूरपश्चिम प्रदेशके मुख्यमन्त्री कमलबहादुर शाह भुँइचालमे परके घाहिल हुइलके उपचार प्रदेश सरकारसे कैना बटैले बाटै ।

बुधके मुख्यमन्त्री तथा मन्त्रीपरिषद्के कार्यालयमे हुइल छलफलमे मुख्यमन्त्री शाह भुँइचालमे घाहिल हुइल सक्कु जनहनके उपचार खर्च प्रदेश सरकरसे ब्यहोर्ना बटाइल हुइट । मंगरके रोज बझाङके जयपृथ्वी नगरपालिका केन्द्र बनाके भुँइचाल गैल रहे । भुँइचालमे परके प्रदेशमे २७ जाने घाहिल हुइल बाटै । सुदूरपश्चिमके आन्तरिक मामिला तथा कानुन मन्त्रालयके अनुसार प्रदेशमे बुधके सकारेसम २७ जाने घाहिल विवरण आइल जनैले बा ।

बझाङमे सबसे ढेर क्षति हुइल बा । बझाङमे किल एक जाने बेपत्ता हुइल बाटै कलेसे १८ जाने घाहिल हुइल बाटै । ओस्टके, अछाममे पाँच जाने, ओ बैतडी तथा बाजुरामे २÷२ जाने घाहिल हुइल आन्तरिक मामिला मन्त्रालय जनैले बा ।

छलफलमे घाहिल हुइलके उपचार प्रदेश सरकारसे कैना, उद्धार, खोज ओ प्रभावितहे आवश्यक राहत सामग्री एकद्वार प्रणालीमे वितरण कैना निष्कर्ष निकरले बा । खोज, उद्धार ओ राहत वितरणके सक्कु जिम्मेवारी प्रदेशके आन्तरिक मामिला तथा कानून मन्त्रालयसे जिल्ला प्रशासन कार्यालय ओ सुरक्षा निकायके समन्वयमे कैना मुख्यमन्त्री निर्देशन डेले बटैलै ।

मुख्यमन्त्री शाहके घरगोसियाइमे हुइल खुला छलफलमे, सभामुख भीमबहादुर भण्डारी, भौतिक पूर्वाधार विकास मन्त्री प्रकाशबहादुर देउवा, उद्योग, पर्यटन, वन तथा वातावरण मन्त्री रमेशसिंह धामी, राज्यमन्त्री गीतादेवी माल, प्रमुख सचिव नारायणप्रसाद शर्मा दुवाडी, नेपाली सेनाके सुदूरपश्चिम पृतनापति, नेपाल प्रहरीके सुदूरपश्चिम प्रदेश प्रमुख, प्रहरी नायव महानिरीक्षक भरतबहादुर बोहरा, सशस्त्र प्रहरी बलके प्रदेश प्रमुख सशस्त्र प्रहरी नायब महानिरीक्षक कुमार न्यौपाने, संयुक्त राष्ट्र संघीय विकास साझेदार संस्था विश्व खाद्य संगठन, स्वास्थ्य संगठन ओ नेपाल रेडक्रस सोसाइटी ओ प्रदेशमे क्रियाशील गैरसरकारी संघ संस्थाके प्रतिनिधिहुक्रनके उपस्थिति रहल रहे ।