‘महिला हिंसा विरुद्धके कानून कार्यान्वयन अभाव’
पहुरा समाचारदाता
धनगढी, १९ कुवाँर । महिला अधिकार तथा टमान संघ संस्थाके प्रतिनिधिहुक्रे महिला हिंसा विरुद्धके कानून कार्यान्वयन अभाव रहल बटैले बटै ।
दलित महिला अधिकार मञ्च कैलालीके आयोजना तथा डिसिएके आर्थिक सहयोगमे हुइल विफेक रोज धनगढीमे हुइल ‘महिला हिंसा विरुद्धके कानून कार्यान्वयनके अवस्था समाधानके उपाय सम्बन्धी सवांद कार्यक्रममे उहाँहुक्रे उ बाट बत्वाइल रहिट ।
जिल्ला अदालत कैलालीके न्यायधिश ओम प्रसाद अर्याल चालु आर्थिक बर्षमे २१/२२ सय मुद्दा रहलमे चाप बह्रके मुद्दाके सुनुवाई ढिला हुइटी रहल बटैलै । उहाँ महिलाके मुद्दाहे प्राथमिकता डेके हलहाली फैसला करटी रहलफे जनैलै ।
दलित महिला अधिकार मञ्च कैलालीके अध्यक्ष सावित्रा घिमिरे अदालतके फैसला कार्यान्वयन नइहुइल बटैली । उहाँ कहली, ढेर पीडित महिलाहे अभिनफे न्याय कहाँ पैना कना पत्ता नइरहल हो । महिला राजनीति, आर्थिक, सांस्कृतिक लगायत सामाजिक रुपमे पीडित हुइल बटै ।
जिल्ला प्रहरी कार्यालय कैलालीके महिला सेलके सरस्वती अधिकारी हिंसा पीडित महिलाहुक्रे ढिला न्याय पाइल बटैली । कैलालीमे जिल्ला प्रहरी कार्यालयलगायत ६ ठाउँमे मुद्दा दर्ता हुइटी रहल बटैली । उहाँ प्रहरी कार्यालयमे महिला हिंसाके मुद्दामे कमी आइलफे बटैली ।
कार्यक्रममे बार कैलालीके सदस्य कृष्ण सुवेदी, ओरेक नेपालके वरिष्ठ कार्यक्रम अधिकृत गीता चौधरी, सुदूरपश्चिम समाजके करुणा नेपाल, रिसर्चर इन्दु थारु, गैर सरकारी महासंघके सचिव लोकमान धामी, दलित महिला अधिकार मञ्च कैलालीके विमला खडायत, कैलारी गाउँपालिकाके न्यायिक समितिके प्रतिनिधि अनिल चौधरी, देउकुमारी विक, दान बहादुर विक, राष्ट्रिय अपाङता महासंघके महासचिव नन्दराज भट्ट, राष्ट्रिय मानव अधिकार आयोगके विदेश चौधरी लगायत आ आपन बाट राखल रहिट ।
कार्यक्रममे अधिवक्ता रेणु प्रसाद श्रेष्ठ महिला हिंसा नियन्त्रण सम्बन्धी विद्यमान कानूनी व्यवस्था ओ चुनौती विषयक कार्यपत्र प्रस्तुत करल रहिट । कैलाली जिल्ला अदालतमे आर्थिक बर्ष २०८०/०८१ के कुवाँर १५ गतेसम घरेलु् हिंसाके ३, अंशके ७७, बहुविवाहके ७, जबरजस्ती करणीके १८, मानव बेचविखके २, आत्महत्या दुरुत्साहन ६ ओ कर्तव्य ज्यानके ३ ठो मुदा दर्ता हुइल उहाँ जनैली ।
दलित महिला अधिकार मञ्च कैलालीके अध्यक्ष सावित्रा घिमिरेके अध्यक्षतामे हुइल कार्यक्रमके संचालन विमला खडायत करल रहिट ।
