धनगढी एफसीके ब्रान्ड एम्बास्डरमे मिस पवी

पहुरा समाचारदाता
धनगढी, २१ कुवाँर । ग्रो ड्रिमर्सके स्वामित्वमे रहल नेपाल सुपर लिग (एनएसएल) के साविक उपविजेता टोली धनगढी एफसीसे अपन ब्रान्ड एम्बास्डरमे कलाकार तथा मोडल मिस पवी (पवी साँकी) हे नियुक्त करले बा ।

धनगढी एफसीके सिईयो सकुश केसी ओ कलाकार मिस पवीसे शुक्रकके एक कार्यक्रमबीच ब्रान्ड एम्बास्डर नियुक्तिके सम्झौता पत्रमे हस्ताक्षर करलै । सम्झौता अनुसार मिस पवी यी सिजनके एनएसएलके लाग धनगढी एफसीके ब्रान्ड एम्बास्डर हुइही । धनगढी एफसीके खेलमे बेला मिस पवी स्टेडियममे बैठके धनगढी एफसीहे समर्थन समेत करही ।
धनगढी एफसीके ब्रान्ड एम्बास्डर नियुक्त हुइलपाछे मिस पवी एकदम उत्साहित हुइल प्रतिक्रिया डेली ।

“नेपाल सुपर लिगके साविक उपविजेता टोली धनगढी एफसीके ब्रान्ड एम्बास्डरके रुपमे जोरे पाके मै एकदम उत्साहित बटु । कब दशरथ रंगशालामे खेल हुई ओ कब खेल हेरे जैम कहिके आतुरफे हुसेक्नु,“उहाँ कहली, “पहिल सिजनमे सक्कुहुनके अपार मायाँ साथ समर्थन पाके धनगढी एफसी उपविजेता बनल रहे । यी सिजनमेफे नयाँ उत्साहके साथ आइल बा । धनगढी अभिन मजा फुटबल पस्कटी दर्शकहे मनोरञ्जित पर्ना विश्वास बा ।’

धनगढी एफसीके सिईयो केसीसे सुदूरपश्चिम ओ कर्णाली प्रदेशके प्रतिनिधत्व करटी रहल नगढी एफसीके ब्रान्ड एम्बास्डरके रुपमे उहे क्षेत्रके लोकप्रिय कलाकार मिस पवीहे ब्रान्ड एम्बास्डरके रुपमे पाके खुशी व्यक्त करलै ।
“सुदूरपश्चिमसे उदैटी लोकप्रिय राष्ट्रिय कलाकार समेत रहल मिस पवीहे धनगढी एफसीके ब्रान्ड एम्बास्डरके रुपमे पाके हम्रे बहुट हर्षित बटी,’ केसी कहलै, “उहाँके आगमनसे टोलीमे नयाँ उर्जा थपल बा । उहाँहे धनगढी एफसी परिवारमे स्वागत करे चाहटु् ।’

नेपाल सुपर लिगके दुसरा संस्करण अइना अगहन ८ से पौष २१ गतेसम काठमाडौंके दशरथ रंगशालामे हुइटी बा ।
एनएसएलके यी सिजनके लाग धनगढी एफसीके मार्की खेलाडीमे नेपाली राष्ट्रिय टिमके प्रतिभावान मिडफिल्डर आशिष चौधरी रहल बटै । आशिषसे शहीद स्मारक लिग ‘ए’ डिभिजन लिगमे चर्च ब्याइज यूनाइटेडसे खेल्टी टोलीहे लिगके बनैना महत्वपूर्ण भूमिका निर्वाह करल रहिट ।

ओस्टेक अक्सनसे धनगढी एफसीसे साइमन लिम्बु, निशान लिम्बु, मिलन राई, सुरेश कुमाल, रन्दीप पौडेल, मनोज राई, कमल श्रेष्ठ, टेकेन्द्र सिंह थापा, देवेन्द्र तामाङ, हेमन्त श्रेष्ठ, अभिषेक गुरुङ, कृतिश रत्न छुन्जु ओ रामचन्द्र वाजीहे अनुबन्ध करटी रहल बा । प्रशिक्षकमे भर धनगढी एफसीसे युगोलकिशोर राईंहे निरन्तरता डेहल बा ।