उद्यम विकास सहजकर्ताहुकनहे प्रशिक्षक प्रशिक्षण तालिम
पहुरा समाचारदाता
धनगढी, २२ कुवाँर । सुदुरपश्चिमाञ्चल पोलिटेक्निकल ईन्स्टिच्युट प्रा.लि. धनगढी कैलालीके आयोजनामे १० दिने तालिमके सम्पन्न हुइल बा ।
यिहे कुवाँर १२ गतेसे २१ गतेसम हुइल तालिम समापन कार्यक्रम ईन्स्टिच्युटके प्रवन्ध निर्देशक सुजितराज शर्माके अध्यक्षता ओ सुदुरपश्चिम प्रदेश सरकारके उद्योग‚ पर्यटन‚ वन तथा वातावरण मन्त्री माननीय रमेश धामीके वडका पहुनामे हुइल बा ।
कार्यक्रममे सम्बोधन करटी मन्त्री धामी उद्यम विकास सहजकर्ताहुकनके भविश्यके बारेमे अपने चिन्तित रहल ओ मन्त्रालय उद्यम विकास सहजकर्ताहुकनसे सहकार्य करके आघे बह्रना बटैलै । उहाँ प्रदेशसे निर्माण करल ऐन नियम तथा कानुनहे पुर्ण रुपमे कार्यान्वयनमे नानेक लाग पहल करटी रहल ओ उद्यम विकास सहजकर्ता संघके सुझाव सहित अन्य आवश्यक पर्ना कानुन निर्माणके लाग पहल कैना बाटफे अवगत करैलै ।
टमान जिल्लासे करके कुल ३० जानेक उद्यम विकास सहजकर्ताहुकनके सहभागीता रहल उ तालिममे सहजीकरण प्रमुख प्रशिक्षकमे भीमबहादुर बिष्ट ओ सहायक प्रशिक्षक नरेशप्रसाद भट्ट रहल रहिट । प्रमुख प्रशिक्षक विष्ट यी तालिमके आवश्यकता ओ महत्वके साथे उद्यम विकास सहजकर्ताहुकनके क्षेत्र हालके वर्तमान अवस्था तथा भविष्यमे यैसिन मेरिक जनशक्तीसे देशमे आर्थिक समृद्धिके लाग खेले सेक्ना भुमिकाके विषयमे प्रष्ट परलै ।
उ अवसरमे तालिमके सहायक प्रशिक्षक तथा राष्ट्रिय उद्यम विकास सहजकर्ता महासंघ नेपाल सुदुरपश्चिम प्रदेश समितिके अध्यक्ष नरेश प्रसाद भट्ट उ अवसरमे उद्यम विकास सहकर्ताके वर्तमान अवस्था भविष्यमे प्रदेश सरकारके ओरसे चाले पर्ना कदमहे समेटके सुदुरपश्चिम प्रदेश सरकार उद्योग‚ पर्यटन‚ वन तथा वातावरण मन्त्री माननीय रमेश धामीहे ६ बुँदे ज्ञपान पत्र समेत हस्तान्तरण करल रहिट ।
सहभागीके ओरसे तालिममे हुइल सिकाई तथा उपलव्धीके साथे भविष्यमे यकर प्रयोगके बारेमे सहभागी सन्तोष डडाल मन्तव्य व्यक्त करल रहिट । तालिम समापन कार्यक्रममे स्वागत मन्तव्य सहभागी बिन्दु चन्द करल रहिट ।
