दुबईके अलकुद्र पार्कमे जितिया पर्व मनागिल
पहुरा समाचारदाता
धनगढी, २२ कुवाँर । थारु समुदायके महान पर्व जितिया दुबईस्थित अल कुद्रा पार्कमे डटकट तथा भेटघाट कार्यक्रम करके मनागिल बा ।
थारु कल्याणकारिणी सभा यूएईके आयोजनामे मनागिल कार्यक्रममे दुबईमे बैठना सैयौंके संख्यामे थारु डिडीबाबु ओ डाडुभैयाहुकनके उपस्थितमे झमटा ओ गीत गाके, नाँचगानके साथ साथे खानपान ओ जितिया पर्व के शुभकामना आदान प्रदान करके मनागिल थारु कल्याणकारीणि सभा यु ई ई के प्रचार प्रसारण विभाग प्रमुख रोशन महतों बटैलै ।
थारु कल्याणकारिणी सभा यूएईके सभापति भागरथी कुमार भगत विदेशी भूमी ओ समयके पावन्दीमे कार्यक्रममे सहभागी जनाडेहल कहटी थाकस यूएईसे हृदयसे धन्यबाद व्यक्त करलै । थारु समुदाय जहाँ रहलेसेफे अपन संस्कार संस्कृति नइभुलाइल ओ यिहीहे संरक्षण कैना प्रतिवद्ध रहल उहाँ बटै ।
थारु समुदायके डिडिबहिनीहुक्रे मनैना यी पर्वके अवसरमे कार्यक्रम सफल पारेक संस्थाके सचिव तथा कार्यक्रम संयोजक रमानन्द चौधरीलगायत सस्थाके उपसभापति तुलसी महतो, पबि महतो, रमन चौधरी, महासचिव खेम महतो, सक्कु विभागिय प्रमुखलगायतके विशेष पहुनाहुकनके सहभागिता रहल रहे ।
