जैविक तटबन्धके अनुगमन

पहुरा समाचारदाता
हसुलिया, २२ कुवाँर । कैलारी गाउँपालिका वडा नम्बर ३ बडका मुडाके सुर्मी खोलामे बनागिल जैविक तटबन्धके अनुगमन कैगिल बा ।

बहुउद्देश्यीय विकास समाज, डडेल्धुरासे कैलारी गाउँपालिकाके समन्वयमे बनागिल जैविक तटबन्धके अनुगमन गाउँपालिका अध्यक्ष राजसमझ चौधरी, प्रमुख प्रशासकीय अधिकृत विरबहादुर ऐर, वडा नम्बर ४ वडा अध्यक्ष ठागुराम चौधरी, सामाजिक विकास अधिकृत यगम कलेल, वडा नम्बर ३ वडा सदस्य किसानलाल चौधरी, गाउँपालिका अध्यक्षके स्वकीय सचिव जितेन्द्र चौधरी, लाभग्राही समुदाय लगायतसे अनुगमन कैगिल हो ।

अनुगमनके क्रममे गाउँपालिका अध्यक्ष राजसमझ चौधरी कैलारी गाउँपालिकाके ढेर क्षेत्र लडिया, खोला, नालाके कटानमे रहल बटैलै । बहुउद्देश्यीय विकास समाजसे कटान रोके लाग कैगिल जैविक तटबन्ध सह्रनिय रहल उहाँ बटैलै ।

बहुउद्देश्यीय विकास समाज, डडेल्धुरासे ‘बाढी पहिरो जोखिमको पूर्व तयारी तथा प्रतिकार्य परियोजना’ मार्फत केर्क इन एक्ट कार्डएडके सहयोगमे ८५ हजार लागतमे २० मिटरमे जैविक तटबन्ध निर्माण कैगिल बहुउद्देश्यीय विकास समाज, डडेल्धुराके डिआरआर एक्सपर्ट राजेन्द्र रैका बटैलै ।