थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०३ सावन २६४८, बिफे ]
[ वि.सं ३ श्रावण २०८१, बिहीबार ]
[ 18 Jul 2024, Thursday ]

एमाले सुदूरपश्चिम प्रदेशके अध्यक्षमे जैसी निर्विरोध

पहुरा | २५ आश्विन २०८०, बिहीबार
एमाले सुदूरपश्चिम प्रदेशके अध्यक्षमे जैसी निर्विरोध

पहुरा समाचारदाता
धनगढी, २५ कुँवार ।
नेकपा एमाले सुदूरपश्चिम प्रदेशके अध्यक्षमे कृष्णप्रसाद जैसी निर्विरोध निर्वाचित हुइल बाटै । अन्य पदाधिकारी समेत सर्वसम्मत हुइल हुइट ।

अध्यक्ष पदमे मनोनयन दर्ता कराइल निवर्तमान उपाध्यक्ष कमलप्रसाद तिमिल्सिना, वचनबहादुर सिंह ओ भरत साउद उम्मेदवारी फिर्ता लेहलपाछे जैसी निर्विरोध निर्वाचित हुइल हुइट । निवर्तमान प्रदेश सचिवालय सदस्य रहल जैसी तत्कालीन अछाम जिल्ला विकास समितिके सभापति समेत रहल रहिट । उपाध्यक्षमे बाजुराके कालीबहादुर शाही सर्वसम्मत हुइल बाटै ।

हरिसिंह साउद, बलदेव रेग्मी, रणबहादुर महरा, हजारीसिंह साउद ओ गजेन्द्र बहादुर शाही उम्मेदवारी फिर्ता लेहलपाछे शाही सर्वसम्मत चुनल हुइट । सचिवमे भर कैलालीके रणबहादुर चन्द सर्वसम्मत चयन हुइल बाटै । सचिवके प्रत्याशी राजेश खाती, जीवनबहादुर बम ओ रतनबहादुर रेग्मी उम्मेदवारी फिर्ता लेहलपाछे चन्द फेन सर्वसम्मत हुइल हुइट । उपसचिव (खुल्ला) मे कञ्चनपुरके नरबहादुर विक ओ उपसचिव (महिला) मे कैलालीके भागरथी विष्ट चयन हुइल बाटै । उपसचिव (खुल्ला) मे रामदत्त जोशी, अशोककुमार चन्द, सुरेन्द्रबहादुर पाल, हरदेव जोशी ओ पल्लभराज भट्ट उम्मेदवारी दर्ता करैलेसे फेन पाछे फिर्ता लेहल रहिट ।

उपसचिव (महिला) मे कन्दकला राना ओ अर्चना गहतराज उम्मेदवारी फिर्ता लेहल रहिट । पार्टी अध्यक्ष केपी शर्मा ओलीके निर्देशनपाछे निर्वाचन फ्रक्रिया लम्ब्याके मंगरसे नेताहुत्रे सर्वसम्मतिके प्रयास करल रहिट । टमान पदमे आकांक्षा राखल उम्मेदवारहुक्रनहे अन्यत्र व्यवस्थापन कैना आश्वासनसहित उम्मेदवारी फिर्ता कराइल स्रोत बटैले बा ।

अन्तिम समयमे नेता भीम रावल निकट मानल अध्यक्ष पदके उम्मेदवार भरत साउद उपसचिवमे आपन निकट नरबहादुर विकके नाउँमे सहमति खोजल रहिट । नेताहुक्रे विकके नाउँमे सहमति करलपाछे सक्कु पदाधिकारी सर्वसम्मत चयन हुइना अवस्था आइल हो ।

जनाअवजको टिप्पणीहरू