मन्त्री धामीसहितके टोलीसे उद्योग अनुगमन

पहुरा समाचारदाता
धनगढी, २५ कुँवार । सुदूरपश्चिम प्रदेशके उद्योग, पर्यटन, बन तथा वातावरण मन्त्री रमेश सिहं धामी सहितके टिम कैलालीके टमान उद्योगके अनुगमन करले बा ।

उद्योगके स्थिति ओ बजारमे बिक्रि करजैना उपभोग्य बस्तुबारे जानकारी लेहक लाग मन्त्री धामी सहित टमान निकायके टिम कैलालीके कुछ उद्यागमे अनुगमन करल हो । धनगढी उपमहानगरपालिका ओ गोदावरी नगरपालिकामे पर्नार् ४ उधोगके अनुगमन करल मन्त्री रमेश सिहं धामी जानकारी डेलै ।

इ अनुगमन कुहीहे दण्ड जरिवानाके लाग किल नैहोके उद्योगीहुक्रनके समस्या ओ उपभोग्य बस्तुके अवस्था बुझक लाग करल अनुगमन रहल मन्त्री धामी बटैलै । बर्तमान अवस्थामे उद्योग सहज रुपमे कच्चा पदार्थ पाइटै या नै पाइठुइट, सरकारसे सहुलियत करे पर्ना लगायतके समग्र जानकारी लेहक लाग अनुगमन करल मन्त्री धामी बटैलै । उहाँ उद्योगीहुक्रनके समस्या सुन्नाके साथे उद्योगके अवस्थाबारे जानकारी लेहल उहाँ बटैलै । उद्योगीहुक्रनके समस्या समाधानके लाग सरकारसे पहल कैना बटैटी मन्त्री धामी कुछ उद्योग नियम बिपरित काम करल समेट भेटल ओरसे कानुन बमोजिम कार्वाही कैना बटैलै ।

अनुगमनमे वाणिज्य आपूर्ति तथा उपभोक्ता सरक्षण निर्देशनालय, जिल्ला प्रशासन कार्यलय कैलाली ,जिल्ला प्रहरी कार्यलय कैलाली, जिल्ला समन्वय समितिके कार्यलय कैलाली, खाद्य प्रविधि तथा गुण नियन्त्रण कार्यलय कैलाली, वाणिज्य आपूर्ति तथा उपभोक्ता सरक्षण कार्यलय कैलाली, धनगढी उपमहानगर कार्यपालिकाके कार्यालय धनगढी, घरेलु तथा साना उद्योग कार्यलय कैलालीके प्रतिनिधि सहितके टोली अनुगमन करल हो ।