कैलारीम डसिया डेवारीक अवसरम सुरक्षा सम्बन्धी भल्मन्साहुँक्रनसे अन्तरक्रिया
पहुरा समाचारदाता
हसुलिया, २६ कुवाँर । कैलाली जिल्लाक कैलारी गाउँपालिकास्थित हसुलियाम शुकक डसिया सुरक्षा सम्बन्धी प्रहरी प्रशासन, जनप्रतिनिधि व भल्मन्साहुँक्रन विच अन्तरक्रिया कैगिल बा । डसिया डेवारीम घटना, दुर्घटना नहोए कना उद्देश्य लेक भल्मन्साहुँक्रसे अन्तरक्रिया कार्यक्रम कैगिलक हो ।
कैलारी गाउँपालिकाक अध्यक्ष राजसमझ चौधरी टरटिहुवारमे ढयार जाँड डारु पिके झै झगडा कैना, सवारी चलैना करल कारण घटना, दुर्घटना हइल ओरसे ओसिन निकैना आग्रह कर्ल । उहाँ सीमा क्षेत्रम नेपालीहँुक्रे भारतीय पक्षसे दुख पैटी रहल बाट उप्परक निकायम बाट रख्ना बटोइल । वडा नम्बर ४ के वडा अध्यक्ष ठागुराम चौधरी इलाका प्रहरी कार्यालय हसुलियामे दरबन्दी अनुसार व्यवस्था नइकरलपाछे सुरक्षा डेहे नइसेकल बटैल । उहाँ कहलै, लागु औषध दुव्यर्सनीके कारण यूवा पिढीमे भविष्य अन्धारमे धकेल्की रहल बटैलै ।
वडा नम्बर ६ के वडा अध्यक्ष प्रेम बहादुर चौधरी सीमा नाकासे चोरीपैठारी करुइया समुहके चिन्हा जरुरी रहल बटैलै । उहाँ कहलै, भारतके चन्दनचौकी घरसे प्रयोजनके लाग नानल सम्मानहे सहुलियत डेना ओ व्यवसायके लाग नन्ले भन्सार कर बुझैना आवश्यक रहल बटैलै ।
जिल्ला प्रहरी कार्यालय कैलालीक प्रमुख देबेन्द्र बहादुर पाल टिहुवारम अप्रिय घटना हुई निडेना प्रहरीके सक्रियता बह्रैना ओ ओम्न समुदायहे साथ सहयोग डेह पर्ना बटोइल । लागु औषध दुव्र्यशनीसे यूवाहुकनक जीवन बर्बाद हुइटी रलक कहटी अभिभावकहुकनफे सचेत हुइना आग्रह करलै ।
डसियाम अपराधिक घटना नहोए कहटी भल्मन्साहुँक्र प्रहरीहुँक्रनहे सुरक्षा व्यवस्था कडा बनाडेना आग्रह करल रल्ह । कैलारी गाउँपालिका भारतसे सीमा जोरल वरसे लागु औषध दुव्र्यशनी बह्रल पवेरा गाउँक भल्मन्सा खुशीराम चौधरी बटैलै । मनिकापुरके भल्मन्सा करन थारु नेपालीहुँक्रे भारतिया वन विभागसे दुःख पाइल बटैल । उहाँ कहलै, सीमा क्षेत्रम घोंगी कँरहे गैलबेला भारतके वन विभागसे पकरके २ लाखसे ३ लाखसम्म पैसा असुल्ले बटै । कैलारी गाउँपालिका वडा नम्बर ४ घुम्टी तोलके भल्मन्सा तिर्थ प्रसाद नेपाल भल्मन्साहुकनहे परिचय पत्र डेहे पर्ना बटैलै । कैलारी–४ मुडा टोलके भल्मन्सा ठागुराम चौधरी नेपालीहुक्रे भारतके वन विभागसे कहल अनुसार बेठबेगारी करल, चाउर उठाके डेहल मने टमान बाहनामे दुख डेहल बटैलै ।
कैलारी उद्योग वाणिज्य संघके अध्यक्ष नेपालु चौधरी भारतके घुम्ते व्यापारीके कारण यहाँके व्यवसायी मारमे परल बटैलै । उहाँ कहलै, भारतियाहुक्रे साइकलमे सामान नानके व्यापार करठै जिहीसे नेपाली व्यावसायी अप्ध्यारोमे परल बटैलै । ओस्टेक उहाँ भारतके चन्दनचौकी हुइटी पालिकासम मोटरसाइकलसे जाई नइपैना हुइल ओरसे उप्परसम बाट करडेना आग्रह करलै ।
स्थानीय नविन बोहरा, डगरघाटमे गाईगोरु बन्धना, धान थ्रेसिङ कैना कारण दुर्घटना हुइना सम्भावना रहल बटैलै ।
गाउँपालिका स्तरीय भल्मन्सा समितिके सचिव बजारीराम चौधरी छाडा गोरुनके कारण किसान हैरान हुइल बटैलै । दुध खाके गोरुन छोरुइयनहे कार्वाही कैना उहाँ आग्रह करलै ।
दिपेन्द्र माविके प्रअ विनोद भट्टराई लागु औधषके कारण विद्यार्थी कुलटमे फस्टी गैलमे चिन्ता व्यक्त करलै । उहाँ अभिभावकहुकन अपन लर्कन उप्परफे ध्यान डैडेना आग्रह करलै ।
कार्यक्रममे वडा नम्बर १ वडा अध्यक्ष धोजहरिपाल बोहरा, वडा नम्बर ५ वडा अध्यक्ष विष्णु प्रसाद चौधरी, वडा नम्बर ३ वडा अध्यक्ष सन्तराम चौधरीलगायत कार्यपालिका सदस्य, वडा सदस्य, गाउँपालिका थारु कल्याणकारिणी सभा कैलाली क्षेत्र नम्बर ३ क्षेत्रीय सभापति कृष्ण प्रसाद चौधरी अन्र्तगत टमान गाउँकभल्मन्सा, इलाका प्रहरी कार्यालय कैलालीक प्रमुख राजेन्द्र सिंह कार्की लगायतक सहभागिता रहल रह । वसहेक शुकके कैलारी गाउँपालिकाक १५ ठो मुख्य मुख्य ठाउँम लागु औषध दुव्र्यसनी नियन्त्रण सम्बन्धी होडिङ बोर्डफे धारगिल बा ।
