कालीमाई बहुउद्देश्यीय सहकारीके उदघाटन
पहुरा समाचारदाता
हसुलिया, २८ कुवाँर । कैलाली जिल्लाके कैलारी गाउँपालिका–५ गोबरैलामे कालीमाई बहुउद्देश्यीय सहकारी संस्था लिमिटेडके उदघाटन हुइल बा ।
कैलारी गाउपालिका उपाध्यक्ष भगवती चौधरीके वडका पहुनामे सहकारीके विधिवत हुइल हो । कार्यक्रममे बोल्टी सहकारी स्थापनासे किसान ओ विपन्न वर्ग लाभान्वित हुइना उहाँ बटैली । स्थानीय व्यक्तिहुकनसे संचालन करल सहकारीमे यहाँक टमान जाने रोजगार पैनाफे उहाँ बटैली । सहकारीहे दिगो रुपमे संचालन करेक लाग सक्कु शेयर धनीहुकनहे सक्रिय रुपमे लग्ना उहाँ आग्रह करली ।
कार्यक्रममे वडा नम्बर १ वडा अध्यक्ष धोजहरिपाल बोहरा, वडा नम्बर ३ वडा सन्तराम चौधरी, नम्बर ६ वडा अध्यक्ष प्रेमबहादुर चौधरी, समाजसेवी मनिराम बखरिया, कृष्ण प्रसाद चौधरीलगायत शुभकामना मन्तव्य व्यक्त करल रहिट ।
कालीमाई बहुउद्देश्यीय सहकारी संस्था लिमिटेडके अध्यक्ष अमृतचन्द्र चौधरीके अध्यक्षतामे हुइल कार्यक्रममे स्वागत मन्तव्य सहकारीके सचिव तुल्सीप्रसाद चौधरी ओ संचालन मन्जु चौधरी करल रही । सहकारीमे ३० जाने शेयरधनी रहल बटै ।
