स्वास्थ्य कार्यालय कैलाली सम्मानित
पहुरा समाचारदाता
धनगढी, २८ कुवाँर । स्वास्थ्य कार्यालय कैलाली गैल आर्थिक वर्षमे उत्कृष्ट कार्य करल कहटी यी वर्षफे सम्मानित हुइल बा ।
स्वास्थ्य निर्देशनालय दिपायलसे धनगढीमे आयोजना करल वार्षिक समिक्षा कार्यक्रममे ८८ दशमलब ७५ प्रतिशत अंक प्राप्त करटी उत्कृष्ट बनल हो ।
स्वास्थ्य कार्यालय कैलालीहे प्रमाणपत्रसहित सम्मानित करल रहे । ओस्टेक ८२ दशमलब ५ प्रतिशत अंक प्राप्त करटी स्वास्थ्य कार्यालय अछाम दुसरा बनल बा कलेसे ८२ प्रतिशत अंक प्राप्त करटी स्वास्थ्य कार्यालय दार्चुला ओ बैतडी टिसरा बनल बा ।
स्वास्थ्य कार्यालय डडेल्धुरा ओ कञ्चनपुरसे ८१ दशमलब ७५ प्रतिशत अंक प्राप्त करले बा कलेसे डोटी ७९, बाजुरा ७५ दशमलब २५ ओ बझाङ ७२ दशमलब पाँच प्रतिशत अंक प्राप्त करले बा ।
समापनमे सहभागीहुक्रे स्वास्थ्यमे सुधार हुइटी गैलेसेफे अपेक्षा अनुसार लक्ष्य प्राप्त करे नइसेकल प्रतिक्रिया डेले बटै ।
