सामाजिक न्याय ओ सुशासनमे सरकार दृढ रहल बाः प्रम प्रचण्ड

पहुरा समाचारदाता
धनगढी, २९ कुँवार । प्रधानमन्त्री पुष्पकमल दाहाल प्रचण्ड सामाजिक न्याय ओ सुशासनमे सरकार दृढ रहल बटैले बाटै ।

माओवादी नेता कृष्ण बडुवाल (महेश) के श्रद्धाञ्जली सभाहे सम्बोधन कैटी प्रधानमन्त्री प्रचण्ड ओइसीन बटाइल हुइट । बडुवाल सुदूर पश्चिम प्रदेश कमिटी उपाध्यक्ष रहिट । निमोनियासे ग्रसित बडुुवालके कुँवार १० गते भारत उपचारके लाग लैजैना क्रममे निधन हुइल रहे । प्रधानमन्त्री प्रचण्ड बडुवालके स्मृतिमे आयोजित शोक सभामे पुगल रहिट । उहाँ सामाजिक न्याय ओ सुशासनके काम कैटी महेश जैसिन योद्धाहुक्रनके सपना पूरा कैना लक्ष्यमे सरकार रहल बटैलै ।

‘उहाँ जनताके लाग समाज रूपान्तरणके लाग क्रान्तिकारी योद्धा रहिट । इ पुरै परिवार सामाजिक रूपान्तरणके आदर्श प्रस्तुत करले बाटै’ प्रधानमन्त्री प्रचण्ड कहलै ।

‘धैर्य कैके महेशके सपना पूरा करे परल । देशके निम्ति समाजके निम्ति मजा काम कैके आघे बह्रना नै महेश जैसिन योद्धाप्रतिके सम्झना ओ सम्मान हो ।’

महेशके दादा कुम्भ बडुवाल भैयक स्मरण कैटी सरकारसे आभिन मजा काम करे पर्ना बटाइल रहिट । ‘निम्न वर्गके नागरिकहुक्रनके मुद्दा आउर बलगरसे उठाइ परल । विकासहे गति डेके भैयक सपना पूरा हुइ’ उहाँ कहलै ।