परिवर्तन उल्टाइ चाहुइया शक्तिहे परास्त करबः प्रम प्रचण्ड
पहुरा समाचारदाता
धनगढी, २९ कुँवार । प्रधानमन्त्री तथा माओवादी अध्यक्ष पुष्पकमल दाहाल ‘प्रचण्ड’ परिवर्तन उल्टाइ खोजुइया शक्तिहे परास्त कैना बटैले बाटै ।
समाजवादी मोर्चासे सोम्मारके धनगढीमे आयोजना करल सन्देश सभाहे सम्बोधन कैटी उहाँ ओइसीन बटाइल हुइट ।
‘परिवर्तन उल्टाइ चाहुइया शक्तिहे परास्त करब । ओकर लाग हम्रे एक ठाउँमे आइ परल’, उहाँ कहलै, ‘संविधान मिचके संसद् विघटन कैना ओ प्रतिगमनतर्फ लैजैना डरलग्टीके प्रयास हुइल रहे । हम्रे उ षड्यन्त्रहे परास्त करल रही । अदालत फेन जनताके बात सुनके संसद् पुनर्स्थापना करल । अब्बे फेन उ कोसिस हुइटी रहल बा ।’
ओहे सभाहे सम्बोधन कैटी प्रधानमन्त्री प्रचण्ड एमाले अध्यक्ष केपी शर्मा ओलीहे रियल एमाले नैरहल टिप्पणी फेन करले बाटै । ‘अब्बेक एमालेके नेतृत्व जे कैटी बा उहाँ रियल एमाले नैहुइट, उहाँ संघीयतावादी, गणतन्त्रवादी नैहुइट’, प्रचण्डके आरोप रहल बा । युद्धकालीन अवस्था स्मरण कैटी उहाँ अब्बे नेतृत्व तत्कालीन अवस्थामे रहट कलेसे अब्बेक परिवर्तन सम्भव हुइ नैसेक्ना उहाँ बटैलै । अब्बे फेन जनताके उपलब्धि गुम्ना खतरामे रहल प्रचण्डके बुझाइ रहल बा ।
सरकारसे भ्रष्टाचारविरुद्ध अभियान ओ सुशासनके पक्षमे ढेर काम करल प्रधानमन्त्री प्रचण्ड जिकिर करलै । उहाँ ललिता निवास, भुटानी शरणार्थी ओ सुन प्रकरणमे दोषी कारवाहीके भागीदार हुइल बटैलै । ‘औरे फेन फायल हाली खुल्टी बावै’, प्रचण्ड कहलै ।
सभाहे सम्बोधन कैटी नेकपा एकीकृत समाजवादीके अध्यक्ष तथा पूर्व प्रधानमन्त्री माधव कुमार नेपाल समाजवादी मोर्चा तयार करेबर कुछ पार्टीके साटो गैल टिप्पणी करले बाटै ।
सभामे अध्यक्ष नेपाल चार दल एक ठाउँमे आके समाजवादी मोर्चा तयार करेबर देशमे तरङ्ग सृजना हुइल ओ अन्य पार्टीके साटो फेन गैल टिप्पणी करल हुइट । उहाँ वामपन्थी शक्तिहे एक ठाउँमे लन्ना उद्देश्यसे समाजवादी मोर्चा गठन करल स्पष्ट पारल रहिट ।
‘हम्रे चार दल बनके समाजवादी मोर्चा बनैले बाटी कतिपय पार्टीके साटो गैल बा’ उहाँ कहलै ‘साटो जाइ नैपरल साटो आइ परल ।’
देशमे रोजगारी नैहोके विदेश जउइयाके संख्या बह्रटी रहल प्रति चिन्ता व्यक्त कैटी सरकार इ विषयमे गम्भीर बने पर्नामे नेपालके जोड रहे । ‘युवाहुक्रे विदेशमे भौँटारल बाटै । घर घरमे बुढापाकाहुक्रे किल बाटै । देशमे रोजगारी नैहो’, उहाँ कहलै ।
देशी विदेशी शक्तिसे बचके देशके स्वाधीनता रक्षा करे पर्ना आजके आवश्यकता करल नेपाल बटैलै । उहाँ अब्बे गठबन्धनके विकल्प नैरहल बटैलै । गठबन्धनके सरकार पाँच बरससम चल्ना नेपालके दाबी रहे । उहाँ समाजवादी मोर्चा गठनसे कांग्रेस रुष्ट नैहोके खुशी हुइल बटैलै ।
उहे सभाहे सम्बोधन कैटी जनता समाजवादी पार्टी जसपाके अध्यक्ष उपेन्द्र यादव संघीय लोकतान्त्रिक गणतन्त्र खतरामे रहल बटैले बाटै । उहाँ टमान कारणसे अब्बेक उपलब्धि गुम्ना खतरामे पुगल बटाइल हुइट ।
‘नेपालमे जातीय द्वन्द्व फैलैना सद्भाव ओ एकता रहल मुलुकमे धार्मिक द्वन्द्व फैलाके संघीय लोकतान्त्रिक गणतन्त्रहे समाप्त पर्ना खेल हुइटी रहल बा । इहीहे संस्थापन कना बरवार चुनौती बा’ उहाँ कहलै, ‘हमार गल्तीसे लोकतन्त्र गुमे सेकी । ओैरे जनहनहे दोष डेके बैठे नैसेकजाइ । ’
सरकार सदन ओ सडकसे गणतन्त्र विरोधी शक्तिहे पाखा लगाइ पर्ना ओ कानुन बनाके संघीय गणतन्त्रहे संस्थागत करे पर्ना दायित्व रहल यादव बटैलै ।
प्रदेश सरकार अब्बे जिम्मेवारी विहीन जैसिन रहल यादवके कहाइ रहे । ‘प्रदेश सरकारमे झण्डा बा, गाडी बा कानुन नैहो, प्रशासन नैहो अइसीन फेन सरकार रहठ् ?’ उहाँ कहलै ।
बरवार परिवर्तनसे आइल उपलब्धी संस्थागत कैना ओ जनताहे परिवर्तनके अनुभूति कराइक लाग समाजवादी मोर्चा गठन करल यादव बटैलै । उहाँ रेशम चौधरीहे रिहा करलेसे फेन थारु नागरिकहुक्रनके समस्या हल नैहुइल बटैलै ।
‘जेलसे रेशम चौधरीहे रिहा करली मन, थारुहुक्रनके समस्या हल हुइल नैहो । सुकुम्वासीहुक्रनके समस्या हल हुइल नैहो । किसानके समस्या हल हुइल नैहो’, उहाँ कहलै, ‘गरिबी ओ बेरोजगारी बह्रटी रहल अवस्थामे बा । व्यवस्था बदलल् मने, अवस्था बदलल् नैहो । आब हम्रे जनताके अवस्था बदले परल ।’
उहे कार्यक्रमहे सम्बोधन कैटी नेकपाके महासचिव नेत्रविक्रम चन्द विप्लव मुलुक इतिहासके सर्वाधिक जटिल मोडमे रहल बटैले बाटै । उहाँ विश्वके भूराजनीति ओ बाछिटासे नेपालमे प्रभाव परल ओ देश जटिल मोडमे रहल बटाइल हुइट ।
‘इतिहासके सर्वाधिक जटिल मोडमे नेपाल पुगल बा । अब्बे कम्युनिष्टके भविष्य नैहो कना चर्चा सुरु हुइ लागल बावै’, उहाँ कहलै, ‘नेपालके जिम्मा औरे जाने नैहोके, नेपालके जिम्मा माओवादी, कम्युनिष्ट ओ समाजवादी धारके पार्टी लेहे परल ।’
विप्लव खुलके माओवादी केन्द्रके चर्चा ओ प्रशंसा करल रहिट । ‘इ देशमे समस्या परेबर कन्धा लगैना कहलक माओवादीले हो’, उहाँ कहलै ।
नेपाली जनताहे स्वतन्त्रता, समानता ओ स्वाधीनता चाहल कहटी उहाँ दलाल ओ पूँजीपतिहुक्रे सत्ता कब्जा करल बटैलै ।
