आजसे गेटा अस्पताल सञ्चाल

पहुरा समाचारदाता
धनगढी, ०१ कात्तिक । कैलालीके गेटा अस्पताल सञ्चालनमे अइना हुइल बा । मंगरके पत्रकार सम्मेलन मार्फत अस्पताल सञ्चालन अइना बारे जानकारी डेहल हो । एक सय बेड क्षमताके अस्पताल सञ्चालनके लाग सक्कु तयारी पुरा हुइलपाछे आज कार्तिक १ गतेसे अस्पताल सञ्चालनमे अइना अस्पताके निर्देशक डाक्टर प्रमोद जोशी जानकारी डेलै ।

अस्पताल सञ्चालके लाग आवश्यक बजेट, कर्मचारी व्यवस्थापन, स्वास्थ्य उपकरण औषधि लगायतके प्रबन्ध हुइल जनाइल बा । अस्पताल सञ्चालनके लाग सहकायक स्तर ओ श्रेणीविहिन कैके एक सय १० जाने ओ नेपाल सरकार मन्त्रीपरिषदके २०८० कुँवार १६ गतेके निर्णयअनुसार राजपत्राकिंत तथा अधिकृत स्तर ३१ जनहनके अस्थायी दरबन्दी संरचना स्वीकृत हुइलपाछे अस्पताल सञ्चालनमे लाने लागल हो ।

आर्थिक बरस २०८०/८१ के बजेटमे गेटा अस्पतालहे एक सय बेड क्षमताके अस्पतालके रुपमे विकास कैना पूर्वाधार निर्माण, उपकरण खरिद ओ जनशक्ति व्यवस्थापनके लाग बजेट व्यवस्थापन करल रहे । साथे २०८० भदौ १३ गतेके स्वास्थ्य तथा जनसंख्या मन्त्रालयके सचिव स्तरके निर्णय अनुसार वार्षिक विकास कार्यक्रम स्वीकृत होके प्राप्त हुइल एवं चालु आर्थिक बरसके बजेट कार्यान्वयन सम्वन्धि मार्ग दर्शन गेटा अस्पतालहे प्राप्त हुइलपाछे अस्पताल सञ्चालनमे अइना निर्देशक जोशी बटैलै ।

साथे गेटामे ओपिडी सञ्चालनके लाग मन्त्रालयसे भदौ २१ गते अनुमति डेहल रहे । सेती प्रादेशिक अस्पतालके सेवा शुल्क लेना मेरके गेटामे अस्पताल सञ्चालन हुइ लागल उहाँ बटैलै । अस्पताल सञ्चालनमे लानक लाग अब्बे गेटामे निर्देशकसहित चिकित्सक तथा स्वास्थ्यकर्मी लगायत २६ जाने जनशक्ति हाजिरी होसेकल बाटै ।

कात्तिक १ गतेसे गेटा अस्पतालसे जनरल ओपिडी, हाडजोर्नी तथा नसारोग ओपिडी, स्त्री सेवा, जनरल सर्जरी, अल्ट्रासाउन, एक्सरे, प्रयोगशाला सेवा ओ फार्मेसी सेवा सञ्चालनमे अइना बा । साथे एमसीएच क्लिनिक सेवा कात्तिक महिनाभित्रे, खोपसेवा विस्तार ओ अन्तर्ङ सेवा अगहन महिनाभित्रे, इमरजेन्सी सेवा ओ प्रसुती सेवा पुस महिनाभित्रे, शल्यक्रिया सेवा विस्तार चैत महिनाभित्रे, आइसियु तथा एनआइसियु सेवा आगामी बैशाखभित्रे सञ्चालनमे लन्ना तयारी रहल बा ।

अस्पताल सञ्चालन तथा सेवा सुरु कैना विषयमे धनगढी उपमहानगरपालिकाके नगरप्रमुख गोपाल हमाल, प्रमुख जिल्ला अधिकारी, उपमहानगरपालिकाके प्रमुख प्रशासकीय अधिकृत, सुरक्षा निकायके प्रमुख, गोदावरी नगरपालिकाके प्रमुख, वडाअध्यक्ष लगायत सरोकारवाला निकाय अस्पतालके अवलोकन ओ निरीक्षण समेत करल रहिट ।

सेती प्रादेशिक अस्पतालमे बिरामीके चाप बह्रटी गैलपाछे उपचार पैनासे वञ्चित बिरामी आब गेटा अस्पतालसे सहज रुपमे उपचार सेवा पैना हुइल बाटै । गेटा अस्पतालमे क्रमिक रुपमे बेड संख्यासंगे जनशक्ति ओ औषधि लगायतके प्रबन्ध कैना मेरके काम आघे बह्राइल बा ।