प्रदेशके समग्र विकासके लाग ‘प्रदेश लगानी तथा विकास सम्मेलन’ हुइना
पहुरा समाचारदाता
धनगढी, २ कार्तिक । सुदूरपश्चिम प्रदेशसे प्रदेश लगानी तथा विकास सम्मेलन २०८० आयोजना कैना हुइल बा ।
बिफेक रोज बैठल मन्त्रीपरिषदके बैठकसे कैलालीके धनगढीमे उक्त सम्मेलन कैना निर्णय करल हो । अइना फागुन २३ ओ २४ गते दुईदिन आयोजना हुइना उक्त सम्मेलन तथा मन्त्रीपरिषदके निर्णयबारे पत्रकार सम्मेलनमार्फत जानकारी करागैल बा ।
मुख्यमन्त्री कमलबहादुर शाह लगानीके वातावरण बनाइक लाग ओ लगानीके सम्भावना पहिचान कैके प्रदेशके समग्र विकासके लाग सम्मेलन आयोजना करे लागल बटैलै ।
‘इ सम्मलेलन, सम्मेलनके लाग किल नैहोके उपलब्धिमूलक होए, हमार पहलसे प्रदेशमे कुछ करे सेकी ओ लगानीके वातावरण बनाके लगानीकर्ताहुक्रनहे फेन इ प्रदेशमे लाने सेकी’, मुख्यमन्त्री शाह कहलै–‘यहाँ रहल कृषि, पर्यटन, उर्जा, पूर्वाधारके क्षेत्र ओ प्रदेशके समग्र विकासके क्षेत्र ओ लगानीके सम्भावना रहल आयोजनाके पहिचान फेन करक लाग सम्मेलनके आयोजना करे लागल हो ।’
सम्मेलनमे विशेष कैके नेपाल भिट्टर ओ बाहर रहल नेपालीहुक्रनहे आग्रह कैके सक्कु जनहनके साथ ओ सहयोगसे लगानीके वातावरण बनाके आघे बह्रना मुख्यमन्त्री शाह बटैलै । सम्मेलनके लाग प्रदेश सरकार ५० लाख बजेट फेन विनियोजन करल जनाइल बा ।
