अपाङगता रहल व्यक्तिनहे अवसर डेहे परठः गापा अध्यक्ष राजसमझ

पहुरा समाचारदाता
हसुलिया, २ कार्तिक । कैलाली जिल्लाके कैलारी गाउँपालिका अध्यक्ष राजसमझ चौधरी अपाङगता रहल व्यक्तिनहे अवसर डेहे पर्ना बटैलै ।

राष्ट्रिय अपाङग महासंघ नेपाल सुदूरपश्चिम प्रदेशके आयोजना, कैलारी गाउँपालिकाको कार्यालयके सहकार्यमे, दिप अपाङग मानव अधिकार संघ कैलारी समन्वय, राष्ट्रिय आदिवासी जनजाती अपाङग महिला संघ नेपालके संयोजन, यूएन वुमनके आर्थिक सहयोगमे विफेक रोज हसुलियामे हुइल अपाङगता ओ लैङिक उत्तरदायी योजना कार्यक्रम तथा बजेट तर्जुमाके लाग अपाङता रहल व्यक्तिहुकनके लाग पैरबी सम्बन्धी दुई दिने क्षमता अभिबृद्धि तालिमके उदघाटन कार्यक्रममे सम्बोधन करटी उहाँ अपाङता रहल व्यक्ति अवसर पैलेसे सपाङ मनै जस्टे काम करके डेखाइ सेक्ना बटैलै ।

संविधानमे सक्कु जातजाती, वर्ग, समुदायके बराबर हक रहल कना बाट उल्लेख हुइल ओरसे अपाङगता रहल व्यक्तिनहे सक्कु क्षेत्रमे समेटे पर्ना बटैलै । कैलारीमे अपाङता रहल व्यक्ति ढेर रहल ओरसे ओइनहे समेटके जैनाफे उहाँ प्रतिवद्धता जनैलै । गाउँपालिकासे अपाङता परिचय पत्र वितरण करटी आइल ओरसे पाई पर्ना व्यक्तिनहे बञ्चित नइकैना उहाँ बटैलै ।

राष्ट्रिय अपाङग महासंघ नेपाल सुदूरपश्चिम प्रदेशके अध्यक्ष मानबहादुर साउदके अध्यक्षतामे हुइल कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल योजना छनौट सम्बन्धी सात चरण लगायत बजेटके पूर्व तयारी, स्रोत अनुमान बजेट सीमा निर्धारण, वस्ती तहके योजना छनौट, वडा तहके योजना छनौट, प्राथमिकीकरण लगायत विषयबस्तुमे सहजीकरण करल रहिट ।

उदघाटन कार्यक्रममे कैलारी गाउँपालिका वडा नम्बर १ के वडा अध्यक्ष धोजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ७ के वडा अध्यक्ष दिपेन्द्रबहादुर बम, सिड वानके अध्यक्ष दुर्गा चौधरीलगायत ३० जाने अपाङता रहल व्यक्तिहुकनके सहभागिता रहे ।

तालिममे सहभागि मन्से ८० प्रतिशत अपाङगता रहल जनजाती, दलित, अल्पसंख्यक महिला ओ २० प्रतिशत अपाङता रहल पुरुषहुकनके सहभागिता रहल बा । तालिममे सहजीकरण जिल्ला कोडनेटर चन्द्रकान्त पनेरु करल रहिट । तालिम शुकके रोज समापन हुइना बा ।