यौन तथा प्रजनन् स्वास्थ्य शिक्षा डेहे पर्नामे जोड
पहुरा समाचारदाता
धनगढी, ३ कात्तिक । यौन तथा प्रजनन स्वास्थ्य शिक्षाबारे स्कूलके पाठ्यक्रममे राखे पर्ना एक कार्यक्रमके सहभागीहुक्रे जोड डेले बाटै ।
शुकके रोज यार्डसे धनगढीमे आयोजित वृहत यौनिकता शिक्षाबारे पत्रकारहुक्रन बिच अन्तरक्रियामे स्थानीय तहसे आपन पाठ्यक्रममे उ शिक्षाबारे विषयवस्तु राखे पर्नामे जोड डेहल हुइट ।
नेपाल पत्रकार महासंघ कैलालीके अध्यक्ष हिमाल जोशी किशारे किशोरीहे यौन तथा प्रजनन् स्वास्थ्य शिक्षाबारे सक्कु स्थानीय तहसे आपन स्थानीय पाठ्यक्रममे यौन तथा प्रजनन् स्वास्थ्य बारे शिक्षा डेहे पर्ना बटाइल रहिट । ओस्टके उहाँ प्रदेश तथा स्थानीय सरकार नीति तथा कार्यक्रम बनाके वृहत यौन शिक्षाबारे समुदाय स्तरमे जनचेतना फैलाइ पर्ना फेन सुझाव डेहल रहिट ।
ओकर साथे उहाँ मिडिया फेन आपन सम्पादकीय अथवा लेख, समाचार मार्फत समुदाय स्तरमे यौन तथा प्रजनन् स्वास्थ्यबारे कलम चलाई पर्ना आवश्यक रहल बटाइल रहिट ।
यौन तथा प्रजनन् स्वास्थ्य बारे जानकारी नैहोके अब्बेक किशोरकिशोरी छोट उमेरमे भोज कैनाके साथे ओइनमे टमान मेरिक स्वास्थ्य समस्या डेख पर्ना हुइल ओरसे वृहत रुपमे यौन तथा प्रजनन् स्वास्थ्य शिक्षा आजके आवश्यकता रहल औँल्याइल बा ।
स्वास्थ्य कार्यालय कैलालीके आशा थापा किशोरकिशोरी तथा समुदाय स्तरमे यौन तथा प्रजनन् स्वास्थ्य बारे जनचेतना अभावके कारण स्वास्थ्य क्षेत्रमे ढेर समस्या तथा चुनौती डेख परल बटैली । उहाँ नवजात शिशु तथा मातृ मृत्युदरमे वृद्धि, मानसिक तथा नैसर्ना रोगके भार उच्च, सडक दुर्घटना, आत्महत्या, कुपोषण लगायतके समस्या डेख परल बटैली ।
कार्यक्रममे नेपाल परिवार नियोजन संघके चेतराज फुलारा वृहत यौनिकता शिक्षाके सन्दर्भ ओ सान्दर्भिकता बारे आपन प्रस्तुती राखल रहिट ।
कार्यक्रममे यार्डके अध्यक्ष स्माइल चौधरी ओ महेन्द्र शाही सहजीकरण करल रहिट ।
