अपाङता रहल व्यक्तिनके लाग क्षमता अभिवृद्धि तालिम

पहुरा समाचारदाता
हसुलिया, ३ कार्तिक । अपाङगता ओ लैङिक उत्तरदायी योजना, कार्यक्रम तथा बजेट तर्जुमाके लाग अपाङगता रहल व्यक्तिहुकनके लाग पैरवी सम्बन्धी दुई दिने क्षमता अभिवृद्दि तालिम हसुलियामे सम्पन्न हुइल बा ।

राष्ट्रिय अपाङग महासंघ नेपाल सुदूरपश्चिम प्रदेशके आयोजना, कैलारी गाउँपालिकाको कार्यालयके सहकार्यमे, दिप अपाङग मानव अधिकार संघ कैलारी समन्वय, राष्ट्रिय आदिवासी जनजाती अपाङग महिला संघ नेपालके संयोजन, यूएन वुमनके आर्थिक सहयोगमे तालिम हुइल हो । तालिम समापन कार्यक्रमके वडका पहुना कैलारी गाउँपालिकाके उपाध्यक्ष भगवतीकुमारी चौधरी ओ विशिष्ट पहुना वडा नम्बर १ के वडा अध्यक्ष धोजहरिपाल बोहरा रहिट ।

तालिम समापन कार्यक्रममे बोल्टी गाउँपालिका उपाध्यक्ष भगवती कुमारी चौधरी अपाङगता रहल व्यक्तिनहे समेट लैजैना बटैली । उहाँ कहली, ‘मै अपाङगता परिचयपत्रके लाग ढेर जाने निवेदन दार मने निर्देशिका अनुसार केल परिचय पत्र वितरण कैगिल बा । ढेर जैसिन अपाङता रहल व्यक्ती परिचयपत्रसे बञ्चित रहल बटै । अपाङगता रहल सक्कु व्यक्तिनहे परिचयपत्र डेहुवाइल लाग निर्देशिका परिवर्तनके लाग प्रदेश ओ संघमे दवाव आवश्यक रहल बटैली । अपाङता रहल व्यक्तिहुकनके लाग सहायक सामाग्री आवश्यक रहल ओरसे पालिकासे पहल कैना उहाँ प्रतिवद्धताफे जनैली ।

कैलारी गाउँपालिका वडा नम्बर १ के वडा अध्यक्ष धोज हरिपाल बोहरा तालिममे सिखल ज्ञान व्यवहारमे उटर्ना आग्रह करलै । उहाँ पालिकाभिटर बन्ना लौवा भवन अपाङगतामैत्री बनैनाफे प्रतिवद्धता जनैलै ।

कार्यक्रममे राष्ट्रिय अपाङग महासंघ नेपाल सुदूरपश्चिम प्रदेश सदस्य दिलिप चौधरी अपाङगता रहल व्यक्तिके हकमे आवश्यकताके आधारमे बजेट विनियोजन करे पर्ना आग्रह करलै । अपाङगता रहल व्यक्तीनहे सहायक सामाग्री जिर्ण हुसेकल ओरसे पालिकासे अपाङता सामाग्री उपलब्ध कराडेना उहाँ माग करलै ।

तालिममे कैलारी गाउँपालिकाके सामाजिक विकास शाखा प्रमुख यगम कलेल योजना छनौट सम्बन्धी सात चरण लगायत बजेटके पूर्व तयारी, स्रोत अनुमान बजेट सीमा निर्धारण, वस्ती तहके योजना छनौट, वडा तहके योजना छनौट, प्राथमिकीकरण लगायत विषयबस्तुमे सहजीकरण करल रहिट ।

राष्ट्रिय अपाङग महासंघ नेपाल सुदूरपश्चिम प्रदेशके अध्यक्ष मानबहादुर साउदके अध्यक्षतामे हुइल समापन कार्यक्रममे कार्यक्रमके वडका पहुना, विशिष्ट पहुना तालिममे सहभागीहुकनहे प्रमाणपत्र वितरण कैगिल रहे ।
राष्ट्रिय अपाङग महासंघ नेपाल सुदूरपश्चिम प्रदेशके अध्यक्ष साउद सार्वजनिक भवन अपाङगतामैत्री नइबनलपाछे सेवा लेनामे कर्रा हुइल बटैलै । ओस्टेक करके विफेक रोज उदघाटन कार्यक्रमके वडका पहुना कैलारी गाउँपालिका अध्यक्ष राजसमझ चौधरी, वडा नम्बर १ के वडा अध्यक्ष धोजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ७ के वडा अध्यक्ष दिपेन्द्रबहादुर बम, सिड वानके अध्यक्ष दुर्गा चौधरीलगायत पहुनाके सहभागिता रहे ।

३५ जानेक सहभागिता रहल तालिममे कैलारी गाउँपालिकाके ९ वडाके अपाङगता रहल महिला तथा पुरुषहुकनके सहभागिता रहल रहे । तालिममे विशेषत करके अपाङगता रहल व्यक्तिहुकनमेफे अति सीमान्तकरण ओ न्यूनप्रतिनिधित्व रहल अपाङगता रहल महिला, आदिवासी जनजाति, दलित, मधेशी, मुश्लिम, यौनिक तथा लैङिगक अल्पसंख्यक समुदायके अपाङगता रहल व्यक्ति, मानसिक तथा मनोसामाजिक अपाङगता रहल व्यक्ति, अटिज्म रहल व्यक्ति, वौद्धिक अपाङगता रहल व्यक्ति, श्रवणदृष्टिवीहिन रहल व्यक्ति, एचआइभिएड्स् प्रभावित अपाङगता रहल व्यक्ति, पहिचान हुई नइसेकल अपाङगता रहल व्यक्ति जस्टे अल्विनो रहल व्यक्तिहुकनके सहभागिता रहे ।

तालिममे सहभागि मन्से ८० प्रतिशत अपाङगता रहल जनजाती, दलित, अल्पसंख्यक महिला ओ २० प्रतिशत अपाङता रहल पुरुषहुकनके सहभागिता रहल बा । दुई दिनसम संचालन हुइल तालिममे सहजीकरण जिल्ला कोडनेटर चन्द्रकान्त पनेरु करल रहिट ।