जोशीपुर भल्मन्सा समाजसे सांस्कृतिक कार्यक्रम ओ शुभकामना अदानप्रदान
पहुरा समाचारदाता
जोशीपुर, ४ कार्तिक । कैलाली जिल्लाके जोशीपुर गाउँपालिकास्तरीय भल्मन्सा समाजक आयोजनाम आज सांस्कृतिक कार्यक्रम ओ शुभकामना अदानप्रदान कैगिल बा ।
जोशीपुर गाउँपालिकास्तरीय भल्मन्सा समाजक संयोजक सट्टाराम चौधरीक घरगोस्याम हुइल कार्यक्रमम सुदूरपश्चिम प्रदेश भुमि व्यवस्था, कृषि तथा सहकारी मन्त्रालयक राज्यमन्त्री कैलाश चौधरी वडका पहुना रहल रल्ह । वसहेक विशिष्ट पहुना जोशीपुर गाउँपालिकाक अध्यक्ष चित्रबहादुर चौधरी रहल रल्ह ।
उदघाटन कार्यक्रमम बोल्टी राज्यमन्त्री चौधरी थारु समुदायके मौलिक टिहुवारमे परिवर्तन हुइटी गैल बटैलै । उहाँ कहलै, ‘भेषभुषा, टरटिहुवारहे ढेर परिवर्तन करलेसे मौलिकता हेराई सेक्ठ । थारुपन, पहिचान हेराई सेकठ । थारु समुदायके पुरान गीतबाँस, नाँच हेराइटा यिहीहे संरक्षण प्रवद्र्धनके लाग सांस्कृतिक कार्यक्रमके आयोजना कैना आवश्यक बा ।’
सांस्कृतिक तथा शुभकामना अदानप्रदान कार्यक्रममे गाउँपालिका भरिक मुङगहुवा, शखिया, लटठहुवा ओ झुम्रा नाँच प्रदर्शन कैथिल बा ।
