जखौर तालके निरन्तर विकास हुई पर्नामे जोड
पहुरा समाचारदाता
धनगढी, ५ कार्तिक । कैलालीके धनगढी उप–महानगरपालिका वडा नं ७ स्थित जखौर तालके प्राङगणमे डश्या डेवारी मिलन ओ नाचगान कार्यक्रम–२०८० जखौर बाबा टोल बिकास समुहके आयोजनामे सम्पन्न हुइल बा ।
कार्यक्रमके वडका पहुना धनगढी उप–महानगरपालिका वडा नं ७ के निवर्तमान वडा अध्यक्ष तथा नवज्योति कृषि सहकारी संस्था लि.के अध्यक्ष सिताराम राना रहल रहिट । कार्यक्रममे सम्बोधन करटी धनगढी उप–महानगरपालिकाके वडा नं ७ भौगोलिक हिसाबसे सबसे भारी वडा रहल ओरसे उपमहानगरपालिकासे ढेर ध्यान डेहे पर्ना उहाँ बटैलै । ताल क्षेत्रके वरपर जडान करल सेन्सर लाइट बिगरटी रहल ओरसे मर्मतके लाग नगरके नजर जाई पर्ना उहाँ बटैलै ।
जखौर तालके विकास हुइलेसे पुरे धनगढी उप–महानगरपालिकाकाहे फाइदा हुई, नगरपालिकाभिटरके व्यक्ति रोजगारीफे पैही, उहाँ कहलै । कला, संस्कृति समाजके गहना हो, पहिचान हो, यिहीहे बचाइक लाग स्थानीय सरकारसे विशेष ध्यान डेहे पर्ना, सांस्कृतिक कार्यक्रमके बजेट बिनियोजन करे पर्नाफे उहाँ आग्रह करलै । स्थानीय सरकारसे सांस्कृतिक कार्यक्रमके बजेट नइछुट्याइल ओरसे व्यक्तिगत सहयोग कैनाफे उहाँ प्रतिबद्धता जनैलै ।
जखौर बाबा टोल विकास समुहके अध्यक्ष दिलकुमारी चौधरीके अध्यक्षतामे हुइल कार्यक्रममे विशिष्ट पहुना जखौर बाबा मन्दिर समितिके अध्यक्ष कालीराम राना, देवरिया सामुदायिक वन उपभोक्त समुहके अध्यक्ष शारदा राना, देवरिया गाउँके पढना पृथ्वी राना, देवरिया गाउँके भलमन्सा जगन्नाथ राना, भलमन्सा रतिराम चौधरी, देवरिया सामुदायिक वन उपभोक्त समुहके कोषाध्यक्ष भागीराम चौधरी, बुद्धिजीवी, समाजसेवी, तथा थारु राष्ट्रिय कलाकारके उपस्तिथि रहल रहे ।
कार्यक्रममे थारु राष्ट्रिय कलाकार, स्थानीय कलाकार झुम्रा नाछ सखिया नाँच तथा स्थानीय डान्सके बेजोड प्रस्तुती रहल रहे । कार्यक्रममे कलाकारहुकनहे सम्मान समेत कैगिल बा ।
