अवैध लागूऔषधसहित ६ जाने पक्राउ
पहुरा समाचारदाता
धनगढी, ९ कार्तिक । कैलाली लगायतके ठाउँसे लागु औषधसहित ६ जाने पक्राउ परल बटै ।
धनगढी उपमहानगरपालिका–१२ जुगेडा बैठना २८ वर्षीय राकेश भट्ट, वडा नम्बर ७ मनेहरा बैठना ३४ वर्षीय अमिर खाती ओ २३ वर्षीय नरेश थापाहे अवैध लागूऔषध खैरो हेरोइन ३ सय ९० मिलिग्रामसहित बुधके रात प्रहरी पक्राउ करले बा । अस्थाई प्रहरी पोष्ट जुगेडासे खटल प्रहरी ओइनहे उ खैरो हेरोइनसहित पक्राउ करल हो ।
ओस्टेक करके धनगढी उपमहानगरपालिका–९ बङग्राकटानसे अवैध लागूऔषध ब्राउनसुगर ७ सय २० मिलिग्रामसहित धनगढी उपमहानगरपालिका–७ मनेहरा बैठना २१ वर्षीय नरेश राना ओ सोही उपमहानगरपालिका–१७ पथरिया बैठना १९ वर्षीय हितेश रानाहे बुधके साँझ प्रहरी पक्राउ करले बा ।
ओस्टेक करके मोरङके केरावारी गाउँपालिका–८ आमजुगी बैठना २२ वर्षीय मिलन बिकहे अवैध लागूऔषध ब्राउनसुगर करिब ३ सय मिलिग्रामसहित बुधबार साँझ प्रहरी पक्राउ करले बा । ईलाका प्रहरी कार्यालय केरावारीसे खटल प्रहरी उहाँहे उ पदार्थसहित पक्राउ करल हो । सक्कु घटनाके सम्बन्धमे प्रहरी आवश्यक अनुसन्धान करटी रहल बा ।
