अवैध लागूऔषधसहित टमान ठाउँसे १० जाने पक्राउ

पहुरा समाचारदाता
धनगढी, १२ कार्तिक । प्रहरीसे अवैध लागु औषधसहित टमान ठाउँसे १० जनहनके पक्राउ करल बा ।

कैलालीके भजनी नगरपालिका–२ गौनियासे अवैध लागूऔषध खैरो हेरोइन १ ग्राम १ सय ९० मिलिग्रामसहित सोही नगरपालिका–१ बैठना २६ वर्षीय तपेन्द्र बोहरा समेत २ जनहनहे शनिच्चर दुपहर प्रहरी पक्राउ करले बा ।
ईलाका प्रहरी कार्यालय टीकापुरसे खटल प्रहरी से.७ प १०१६ नम्बरके मोटरसाइकलमे सवार ओइनहे उ पदार्थसहित पक्राउ करल हो ।

ओस्टे कैलालीके टीकापुर नगरपालिका–९ खक्रौलास्थित सडकसे अवैध लागूऔषध खैरो हेरोइन ९ सय ९० मिलिग्रामसहित उहे ठाउँ बैठना २२ वर्षीय नरेश रावल समेत २ जनहनहे शनिच्चर साँझ प्रहरी पक्राउ करले बा । प्रहरी चौकी कालाकुण्डासे खटल प्रहरी ओइनहे उ पदार्थसहित पक्राउ करल हो ।

ओस्टे सर्लाही जिल्लाके कबिलसी नगरपालिका–९ सलेम्पुरसे अवैध लागूऔषध गाँजा २ सय ५० किलोग्रामसहित उहे नगरपालिका–१० बैठना २४ वर्षीय भाग्यनारायण महतो समेत २ जनहनहे शनिच्चर रात प्रहरी पक्राउ करले बा । ईलाका प्रहरी कार्यालय हरिपुरसे खटल प्रहरी ज.१ त ५५५१ नम्बरके ट्याक्टरहे जाँच कैना क्रममे ट्याक्टरमे सवार ओइनहे उ गाँजासहित पक्राउ करल हो ।

ओस्टे वीरगंज महानगरपालिका–१६ इनर्वागाउँ चोकस्थित सडकसे अवैध लागूऔषध खैरो हेरोईन १ ग्राम ५ मिलिग्राम ओ नियन्त्रित लागूऔषध नाईट्राभेट २ सय ७० ट्याव्लेटसहित २ जनहनहे शनिच्चर दुपहर प्रहरी पक्राउ करले बा ।
पक्राउ परलमे चितवन कालिकामाई नगरपालिका–६ बैठना १९ वर्षीय सुजन तिवारी ओ उहे नगरपालिका– ७ बैठना १९ वर्षीय शक्ति परियार रहल बटै ।

लागूऔषध नियन्त्रण ब्यूरो शाखा वीरगंज ओ अस्थायी प्रहरी पोष्ट इनर्वागाँउसे खटल प्रहरी टोली भारतसे नेपालओर पैदल अइटी रहल ओइनहे उ लागूऔषधसहित पक्राउ करल हो ।

ओस्टेक करके पर्सा, पटेर्वा सुगौली गाउँपालिका–५ निचुटा नौगछियासे अवैध लागूऔषध गाँजा करिब १० किलोग्रामसहित जगनाथपुर गाउँपालिका–५ सोपुर बैठना ४५ वर्षीय हिरामान यादवहे शनिच्चर रात प्रहरी पक्राउ करले बा । विशेष सूचनाके आधारमे ईलाका प्रहरी कार्यालय पटेर्वा सुगौली ओ अस्थाई प्रहरी पोष्ट सुपौलीसे खटल प्रहरी बीआर २२ एई ६७४० नम्बरके मोटरसाइकलहे जाँच कैना क्रममे बोरामे नन्टी करल उ गाँजासहित ओइनहे पक्राउ करल हो ।

कपिलवस्तु, विजयनगर गाउँपालिका–२ पडरियासे अवैध लागूऔषध ब्राउनसुगर ३ ग्राम ४५ मिलिग्राम ओ १ थान डिजिटल तराजुसहित उहे ठाउँ बैठना २३ वर्षीय बिजय कुमार गुप्ता तेलीहे शनिच्चर साँझ प्रहरी पक्राउ करल बा । तेलीसे लागूऔषधके कारोबार कैना करकल कना विशेष सूचनाके आधारमे ईलाका प्रहरी कार्यालय गणेशपुरसे खटल प्रहरी उहाँहे उ पदार्थसहित पक्राउ करल हो ।
सक्कु घटनाके सम्बन्धमे प्रहरी आवश्यक अनुसन्धान करटी रहल बा ।