कैलारी–४ मे जग्गाके निस्सा वितरण सुरु

पहुरा समाचारदाता
हसुलिया, १४ कार्तिक । कैलाली जिल्लाके कैलारी गाउँपालिका वडा नम्बर ४ भूमिहिन दलित, भूमिहिन सुकुम्बासी, अव्यस्थित बस्ती, मुक्तकमैया परिवारहे जग्गाके निस्सा वितरण सुरु हुइल बा ।

वडा नम्बर ४ के भूमिहिनहुकनहे निस्सा वितरण कार्यक्रम मंगरके रोजसे रोज भित्तरिया ओ मुडा टोलसेसे सुरुवाट करल कैलारी गाउँपालिका वडा नम्बर ४ के वडा अध्यक्ष ठागुराम चौधरी बटैलै । वडा नम्बर ४ मे करिब ५ सय जनहनहे जग्गाके निस्सा वितरण कैना लक्ष्य लेके सुरुवाट कैगिल पहिल रोज ५० जनहन भुमिहिन, मुक्तकमैया, अव्यस्थित, दलित समुदायके परिवारहे जग्गाके निस्सा वितरण करलक उहाँ जनैलै ।

आज (बुधके रोज) वडा नम्बर ४ स्थित खल्ला टोल ओ सुन्दरपुरमे जग्गाके निस्सा वितरण कैना वडा सचिव श्री प्रसाद चौधरी बटैलै । अपनेहुक्रे नम्मा समयसे बैठल जग्गाके कौनो प्रमाण नइरहल मने उ जग्गाके आज निस्सापाइलपाछे खुशी लागल महेश्वर कुमाल बटैलै । निस्सा वितरण कार्यपालिका सदस्य लालबहादुर विक, वडा सदस्य मोहनलाल चौधरी, हरिद्वारी चौधरी, लक्ष्मी चौधरी, सुवा परियारलगायतसे कैगिल रहे ।