डशै डेवारीक अवसरमे शुभकामना आदानप्रदान

पहुरा समाचारदाता
धनगढी, १७ कात्तिक । डशै, डेवारी तथा छठके अवसरमे सेती प्रादेशिक अस्पताल ओ पत्रकार बिच शुभकामना आदानप्रदान तथा अन्तरक्रिया हुइल बा ।

अस्पताल व्यवस्थापन समितिके अध्यक्ष नरबहादुर शाहके अध्यक्षतामे हुइल कार्यक्रममे अस्पतालके मेसु डा. शेरबहादुर कमर अस्पतालसे डेजैना सेवा सुविधा तथा अस्पतालके वस्तुस्थिति बारे जानकारी कराइल रहिट ।

डा. कमर अस्पतालसे सिमित स्रोत साधनसे सेवा सुविधा डेटी रहल बटाइल रहिट । उहाँ अस्पतालमे चेकजाँच कराइ अउइया विरामीके संख्या उच्च मने अस्पतालमे सिमित बेड रहल ओरसे विरामीहे सेवा डेना समस्या रहल बटाइल रहिट ।

ओस्टके उहाँ अस्पतालसे सेवा सुविधा बह्राइल पाछे विरामी फेन उपचारके लाग विगतके तुलनामे बह्रटी गैल बटाइल रहिट ।अस्पतालमे आर्थिक बरस २०७७/०७८ मे ओपिडी ओर ५९ हजार ६२९ जाने सेवा लेहल रहिट । कलेसे आव २०७८÷०७९ मे एक लाख ६ हजार ७६८ जाने सेवा लेहल रहिट कलेसे २०७९/०८० मे दुई लाख ३५ हजार ३१३ जाने विरामी सेवा लेहल जनाइल बा ।

ओस्टके अस्पतालसे डेजैना इमरजेन्सी, डेलीभरी लगायत अन्य सेवा लेहुइया बिरामीके संख्या बह्रटी रहल जनाइल बा ।
कार्यक्रममे पत्रकार जगत साउद, दिलबहादुर छत्याल लगायत अस्पतालसे डेजैना सेवा सुविधा थप सुधार करे पर्ना सुझाव डेहल रहिट ।

कार्यक्रममे अस्पताल व्यवस्थापन समितिके पदाधिकारी, अस्पतालके विभिन्न विभागके प्रमुख, नर्सिङ विभागके प्रमुख ओ पत्रकारहुक्रनके सहभागिता रहल रहे ।