जाजरकोट ओ रुकुम पश्चिम कैके १२८ जहनके मृत्यु
सुर्खेत, १८ कात्तिक । जाजरकोटके रामेडाँडा केन्द्रबिन्दु होके गैल भूकम्पमे परके मृत्यु हुइनाके संख्या १२८ पुगल बा ।
प्राप्त प्रहरीके पाछेक रिपोर्ट अनुसार जाजरकोटमे ९२ ओ रुकुम पश्चिममे ३६ जहनके मृत्यु हुइल जाजरकोटके डिएसपी सन्तोष रोका बटैलैं ।
भूकम्पके कारण भेरी नगरपालिकास्थित खलंगा बजार ओ नलगाड नगरपालिकामे ढेर क्षति हुइल बा ।
भूकम्पके कारण ५५ जानेसे ढेर घाहिल हुइल बटैं । घाहिलके संख्या लगातार बह्रिटिरल डिएसपी रोका बटैलैं ।
घाहिलहुकनके जिल्ला अस्पताल खलंगामे उपचार हुइटा । अस्पता कुछ घाहिलहे सुर्खेत रिफर करले बा ।
रुकुम पश्चिमके प्रहरी प्रमुख नमराज भट्टराईके अनुसार रुकुम पश्चिममे ३६ जहनके मृत्यु होसेकल बा । उमध्ये २७ जहनके सनाखत होसेकल बा कलेसे बाँकीके सनाखत करना क्रम जारी बा ।
रुकुम पश्चिममे सबसे ढेर आठबिसकोट नगरपालिका ओ सानोभेरी गाउँपालिका प्रभावित बा । वहाँ घाहिलके संख्या अस्पतालमे किल ८५ जानेसे ढेर बा कलेसे उद्धारके कार्य हुइटिरहल बा ।
