धनगढी काकडभिट्टा एसि बस सेवा शुरु

पहुरा समाचारदाता
धनगढी, १८ कार्तिक । बिगत ४० बर्षसे सेवा डेटी आइल सुन्दर सुदुरपश्चिम यातायात प्राली धनगढीसे अपन सेवा बिस्तार कैना क्रममे आजसे धनगढी–काकडभिट्टा एसी बस सेवा संचालन करले बा । एसी बसके प्रालिके अध्यक्ष पदमराज सापकोटास हरियर झण्डा डेखाके शुभारम्भ करले बटै ।

बिगतमे उ रुटमे डिलस्क बस सेवा केल रहलमे आजसे एसी बस सेवा समेत शुरु हुइलपाछे यात्रुहुक्रे खुशी ब्यक्त करले बटै ।
करिब दुई करोडके लगानीमे आजसे दुई ठो बससे सेवा डेना अध्यक्ष सापकोटा बटैलै । उहाँ यात्रुहुकनके चाप बढटी गैलेसे बस संख्य समेत थप्टी जैना बटैलै ।

गत हप्ता केल प्रालिसे काठमाडौ–बझाङ–काठमाडौ एसी बस सेवा संचालन करल बटैटी अध्यक्ष सापकोटासे हाली धनगढी–काठमाडौ स्लिपर बस सेवा संचालन कैना बटैलै ।

ब्यबसायीहुक्रे गुरुद्विप सिंह, गिरि श्रेष्ठ ओ महेश श्रेष्ठके लगानी रहल उ एसी बस सेवा धनगढी बसपार्कसे दैनिक बिहान १०ः३० बजे ओ काकडभिट्टासे १२ बजे संचालन हुइना प्रालिके कार्यालय प्रमुख देबिलाल जोशी बटैलै ।