थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०२ सावन २६४८, बुध ]
[ वि.सं २ श्रावण २०८१, बुधबार ]
[ 17 Jul 2024, Wednesday ]

कैलारीसे भुकम्प पीडितहे १०० थान कम्मल सहयोग

पहुरा | २२ कार्तिक २०८०, बुधबार
कैलारीसे भुकम्प पीडितहे १०० थान कम्मल सहयोग

पहुरा समाचारदाता
हसुलिया, २१ कार्तिक ।
कैलारी गाउँपालिकासे गैल १७ गते जाजरकोट ओ रुकुम पश्चिममे आइल विनाशकारी भुकम्पमे परके प्रभावित हुइल भुकम्प पीडितहुकनहे १०० थान कम्मल सहयोग कैना निर्णय करले बा ।

बुधके रोज कार्यपालिकाके बैठकमे भुकम्प पीडितहुकनके राहत स्वरुप १०० थान कम्मल सहयोग कैना निर्णय हुइल गाउँपालिका अध्यक्ष राजसमझ चौधरी बटैलै ।

उहाँ कहलै, ‘विपद जहाँफे जिहीफे प्रभाव पारे सेकठ । १७ गते जाजरकोट ओ रुकुम पश्चिममे गैल विनाशकारी भुकम्पसे ढेर धनजनके क्षति हुइल बा । उ ठाउँके जनता अब्बे पीडित हुइल बटै । दुखके बेला सक्कु जाने मलहम पट्टी लगैना चाही । कार्यपालिकाके निर्णयसे अब्बेक कम्मल सहयोग करल हो ।’

भुकम्पसे ढेर जाने अकालमे ज्यान गुमैनाके साथे भौतिक संरचनाफे भत्कल ओरसे अब्बे जार महिना सुरुवाट हुसेकल ओरसे कम्मल सहयोग करल अध्यक्ष बटैलै ।

भुकम्पसे जाजरकोटमे ९ हजारसे ढेर घर पूर्णरुपमे भत्कल बा । २४ हजारसे ढेर घरमे आंशिक क्षति पुगल बा । भूकम्पसे जाजरकोटमे केल ९९ जाने घाहिल हुइलबेर १०१ जानेक मृत्यु हुइल बा ।

रुकुम पश्चिममे २ हजार १३६ घर पूर्ण क्षति हुइल बा । कलेसे २ हजार ६४२ आंशिक ओ ४ हजार ६७० सामान्य क्षति हुइल बा ।
भूकम्पके कारण रुकुम पश्चिममे ५२ जानेक मृत्यु हुइल बा । ३०९ जाने घाहिल हुइल बटै । घाहिल मध्ये २७ जानेक थप उपचारके लाग सुर्खेत, नेपालगञ्ज ओ काठमाडौं पठाइल बा । १७४ जाने डिस्चार्ज हुइल बटै । २६ के जिल्लाके टमान अस्पतालमे उपचार हुइटी रहल बा ।

जनाअवजको टिप्पणीहरू