संस्कृति संरक्षणके लाग मन्डरा बजैना तालिम

पहुरा समाचारदाता
धनगढी, २३ कार्तिक । कैलाली जिल्लाके कैलारी गाउँपालिका वडा नम्बर ४ के गाउँमे थारु समुदायके संस्कृति संरक्षण कैना विफेक रोजसे मन्डरा बजैना÷बनैना तालिम सुरु हुइल बा ।

‘हमार भाषा, कला, संस्कृति हमार पहिचान यिहीहे बचैना हमार अभियान’ कना मुल नाराके साथ आदिवासी जनजाती थारु समुदायके संस्कृति संरक्षणके लाग सुरु हुइल १० दिने तालिमके उदघाटन कैलारी गाउँपालिकाके उपाध्यक्ष भगवतीकुमारी चौधरी करल रही ।

उदघाटन कार्यक्रममे सम्बोधन कैटी उहाँ थारु समुदायके अपने भाषा, कला संस्कृति, परम्परा, रितति संंस्कृति रहल मने विस्तारै लोप हुइटी गैल बटैली । पुर्खा अपन ज्ञान सीप विटलपाछ अपनही लैजाइटै, उहाँ कहली, ‘पुर्खाके ज्ञान सीप हस्तान्तरण करे नइसेक्लेसे हमार पहिचान ओराजाई । यूवा पिढी परम्परागत रिति संस्कृतिसेफे डिजे ज्ञान डेले बटै ।’ थारु गाउँघरमे फेरसे पुरान नाँच सुरुवाट कैना प्रयास हुईबेर मन्डरीय नइमिल्ना ओरसे मन्डरा मनै उत्पादनके लाग तालिम करल हो ।

गाउँपालिकासे अब्बे ढकिया बुन्ना, थारु लेंहगा सिल्ना तालिम डेसेकल उपाध्यक्ष बटोइली । उहाँ कहली, थारु समुदाय अपन प्रयोग कैना चिज पहिले अपनही बनाइट, अपन खैना सक्कु चिज अपनही उत्पादन करिट मने अब्बे सुकुवार हुइटी गैल बटै । पालिकासे जिविकोपार्जनसे लेके आयमुलक सीप मुलक तालिम डेसेकल बा । उहीहे सदुपयोग करलेसे आम्दानीके स्रोत बने सेकी लर्का बच्चा पैसा आइसेकी ।’लेहंगा तालिमपाछे आब लेंहगा लेहक लाग बाहेर जाई नइपर्नाफे उहाँ बटैली ।

थारु समुदायसे परम्परासे प्रयोग करटी आइल डिलिया, छिटवा,छिटनी, भौका, बन्ठी, खैचा, ढकिया, लोप हुइटी जाइटा, ओकर सट्टा प्लाष्टिकके भाँडा प्रयोग बह्रल बा । प्लाष्टिक भाँडा मानव स्वास्थ्य ओ वातावरणके लाग नइमजा रहल उपाध्यक्ष बटैली ।

कार्यपालिका सदस्य लालबहादुर विक थारु समुदायक रिति संस्कृति लोप हुइटी रहल यूवा पिढीहे सिखैना आवश्यक रहल बटैलै । तालिममे सहभागी सत्य चौधरी कैलारी गाउँपालिकासे यी मेरिक तालिम पहिल चो डेहल ओरसे अपनेहुक्रे मन्डरा बजैना÷बनैना सीपके अवसर पाइल बटैलै ।

तालिमके मन्डरा बजैना प्रशिक्षक ललता प्रसाद चौधरी थारु समुदायमे टमान मेरिक नाँच रहल ओ एक्के नाँचके टमान खोट रहल बटैलै । उहाँ कहलै, मै फे मन्डरा बजैटी बजैटी सिखल हुँ मने गाउँपालिकासे यूवा पिढीहुकनहे सिख्ना अवसर प्रदान करले बा, सहभागिहुक्रे ध्यान डेके सिख्ना उ आग्रह करलै ।

कार्यक्रम वडा नम्बर ४ क वडा अध्यक्ष ठागुराम चौधरीक घरगोस्यामे हुइल रहे । कार्यक्रममे सम्बोधन करटी उहाँ थारु समुदाय ढेर नाँच लोप हुइटी रहल ओरसे यिहीहे संरक्षण कैना तालिमके आयोजना करल बटैलै । मन्डरा बनैना प्रशिक्षक छल्लु चौधरी मन्डरा बजुइयाहे हल्का बनैना ज्ञान रहना आवश्यक रहल बटैलै । कार्यक्रममे स्वागत मन्तव्य वडा सदस्य हरिद्वारी चौधरी ओ संचालन वडा सचिव श्रीप्रसाद चौधरी करल रहिट । तालिममे १५ जाने मन्डरा बजैना, बनैना तालिम लेटी बटै ।