कमला कहली,‘कोशिश नेपाल बोल्ना हिम्मत बह्राइल’

प्रेम चौधरी
धनगढी, २४ कार्तिक । धनगढी उपमहानगरपालिका–१५ उर्मीके कमला रानाहे छोट्टेसे मानसिक समस्या डेखा परल रहे । मानसिक समस्या डेखा परलपाछे हुकहिन अपन भविष्यके बारेमे ढेर एक चिन्ताले सटाए, उ समस्या डेखा परलपाछे औषधी खाई सुरु करली, पह्राईहे निरन्तरता डेहे नइसेक्के कक्षा १० मे पुगके विश्राम लेहे परलिन ।

यी समस्या आइलपाछे अपन जिन्गी कैसिक चलैम कहिके भारी सोच रहे, उहाँ कहली, अध्ययनहे स्थागित करके सिलाई कटाई सिख्नु, ६ महिनामे सर्ट पैन्टसे लेके सुरुवाल कुर्टाफे सिए जन्नु । जहाँ पाउँ उहे ड्रा बनाउ ।’
उ कहली, ‘मै ठीक हुइलपाछे सिलाई कटाई सुरुवाट करनु, लुग्गाफे ढेर आइलागल रहे । पैसाफे ढेर कमासेकल रहु । स्वास्थ्यमे सुधार आइलपाछे भोजफे हुइल । भोज हुइनासेफे पहिले मै अपनबारेमे जानकारी डेहल रहुँ ।’

कमलाके भोज पशु भेटनरीके डाक्टरसे हुइल । उहाँ सास ससुर घर परिवार सब मजा पैली । कुछ समस्या आइलपाछे घरपरिवार साथ, सल्लाह डेटी रहल उहाँ बटैठी । कमलाके अब्बे ५ बरसके एक ठो छावाफे रहल बटिन ।
कमला कहली, ‘पहिले मै जहाँ टहाँ ओटरा बोले नइसेकु कोशिस नेपालमे जोरलपाछे अब्बे कौनोफे सभामे बोल्न कर्रा नइलागठ । उहाँ खुल्के अपन समस्या रख्नाके साथे मानसिक समस्याबारे और जनहनहे जानकारी डेहल बटैठी । उहाँ कहली, हमार यहाँ कोशिस नेपालसे महिला समुह बनैले बा । जौन प्रत्येक महिनामे बैठक हुइठ, जेम्ने मानसिक समस्याबारे जनचेतनामुलक जानकारी लेनाडेनाके साथे सेवा सुविधाबारे छलफल कैना करल कमला बटैठी ।

उहाँ कहली कोशिशमे आवद्ध हुइलपाछे मोरमे बोल्न ओ कुछफे करे सेक्ना हिम्मत आइल बा । अब्बे कालिका सामुदायिक वन उपभोक्ता समुहके सहसचिवफे बटु । अइना दिनमे नेतृत्व लेनामे पाछे नइपर्ना उहाँ बटैठी ।
कमला कहठी मानसिक समस्या नुकाके समाधान नइहुइना ओरसे अपन समस्याबारे जानकारी करैटी औषधी उपचार कैले निम्मन हुइना बटैठी ।

ओस्टेक करके धनगढी उपमहानगरपालिका १५ के एक जाने महिला नाउँ परिवर्तन ‘बि’ अपनहे १६ बरसपाछे मानसिक समस्या डेखा परल बटैठी । उहाँ कहली,‘मै छोटम कबु विमार हुइलक पटा नइपैनु । मोर भोज हुइलपाछे ससरार घर झैझगडा डेखके मानसिक समस्या आइल । घरमे सास ससुर जाँरडारु पिके झै झगरा करेलागलपाछे मोर मुन्टी बठैना सुरु हुइल । मै बेहोशफे हुइ लग्नु । पाछे मानसिक समस्या आइलपाछे समाजमे सामाजिक लाल्छना लगैना सुरु हुइल ।’

उहाँ कहली, मै घरेलु हिंसा सहिके बैठनु । अपने नातपाता सामाजिक लाल्छना लगैलै । मही समाज निकर्ना कर्रा हुइल । अभिनफे जिन्गीभर नइविस्रैना पीडा सहिके बैठल बटु ।
उहाँ कहली, कोशिस नेपालमे संलग्न हुइल एक बरस पुगल बा । अब्बे बोले सेक्ना हिम्मत आइल बा । पहिलेक जैसिन ंिहसा हुइलेसे जहाँफे जाके आवाज उठाई सेक्ना उहाँ बटैठी ।

कोशिश नेपाल (राष्ट्रिय मानसिक स्वास्थ्य स्वावलम्बन संगठन)के मनोविमर्शकर्ता पशुपति खाती खडका धनगढी उपमहानगरपालिकाके टमान वडामे १०४ जाने मानसिक समस्या रहल व्यक्ति सम्पर्क रहल बटैठी । उहाँ कहली, ‘कोशिश नेपाल मानसिक समस्या रहल व्यक्तिहुकनहे जनचेतनामुलक कार्यक्रमके साथे सेवा सुविधा ओ उ व्यक्तिनहे परिचयपत्रके लाग पहल कैटी रहल बा ।’