ठेक्का लेके काम निकैना निर्माण कम्पनीहे धनगढी उपमहानगरसे जरिवाना तोकल
पहुरा समाचारदाता
धनगढी, २४ कार्तिक । नम्मा समयसे योजना ओगटके रख्ना निर्माण कम्पनीहे धनगढी उपमहानगरपालिकाके २८ औँ कार्यपालिका बैठकसे दैनिक जरिबाना लगैना निर्णय करल करले बा ।
उपमहानगरपालिका अन्तर्गत सञ्चालित टमान दश ठो योजनामे ठेक्का लेके काम निकैना निर्माण कम्पनीहे जरिवाना लगैना ओ कार्यप्रगतिके समयसीमा तोक्न निर्णय करल इन्जिनियर दिजराज भट्ट बटैलै । धनगढी उपमहानगरपालिकाके वडा नम्बर १६ मे रहल सुखानी गुरही खोलामे मोटरेवल पुल निर्माण कैना ३ करोड २ लाख ५४ हजार ५१७ रुपैयाँमे २०७८ कार्तिक १६ मे ठेक्का सम्झौता हुइल रहे ।
२०८० कुवाँर मसान्तमे काम सेक्ना करके ठेक्का पाइल टेडी मित्र जेभीसे हालसम ३० प्रतिशत केल काम करले बा । ओस्टे वडा नम्बर ६ मे रहल सुकुटी नालामे पक्की पुल निर्माण कैना २ करोड २८ लाख ७२ हजार २७३ रुप्यामे २०७८ कार्तिक १४ मे टेडी मित्र तेज जेभीसंग ठेक्का सम्झौता हुइल रहे । २०८० कुवाँर कुवाँर मसान्तमे काम सेक्न सम्झौता हुइलेसेफे हालसम केबल ३० प्रतिशत केल काम हुइल बा । यी दुनु योजनामे उपमहानगरपालिकासे माघ मसान्तसम ¥याफट फाउन्डेसन, चैत मसान्तसम अबन्टमेन्ट ओ २०८१ असार १५ मे डेक स्ल्याब सेक्के पर्ना समय निर्धारण करले बा । तोकल समयभिटर तोकल काम निकरलेसे निर्माण कम्पनीसे क्षतिपूर्ति तिरे पर्ना इन्जिनियर भट्ट बटैलै ।
धनगढी उपमहानगरपालिकाके टमान वडामे चार ठो विद्यालय भवन निर्माण कैना २०७७ पुस १४ ममे ठेक्का सम्झौता हुइल रहे । चारु विद्यालय भवन निर्माण कैना ठेक्का बडा तेडी डुणे कन्स्ट्रक्सनसे हात पारल रहे । कम्पनीसे वडा नम्बर १३ मे रहल जनता राष्ट्रिय माध्यमिक विद्यालय, वडा नम्बर १२ मे रहल दुर्गा आधारभूत विद्यालय ओ शारदा माध्यमिक विद्यालय वडा नम्बर १४ मे रहल पञ्चोदय माध्यमिक विद्यालयके भवन निर्माण कैना ठेक्का पाइल रहे ।
कम्पनीसे हरेक विद्यालय भवन निर्माण कैना ८६ लाख २० हजार ४८२ रुप्या ८५ पैसामे ठेक्का सम्झौता करले बा । सम्झौता अनुसार सक्कु विद्यालयके काम २०७९ पुस मसान्तमे पूरा हुई पर्ना हो । मने, कम्पनीसे जनता राष्ट्रिय माध्यमिक विद्यालयममे ४५ प्रतिशत, दुर्गा आधारभूत विद्यालयममे ७५ प्रतिशत, पञ्चोदय माध्यमिक विद्यालयमे ६५ प्रतिशत ओ शारदा माध्यमिक विद्यालयमे भर ५ प्रतिशत केल काम करले बा । उपमहानगरपालिकासे बार बार म्याद थप करलेसेफे काम सम्पन्न निकरल ओरसे अन्तिम पटकके लाग २ सय दिन थप करले बा । यी अवधिमे निर्माण कम्पनीहे प्रतिदिन सम्झौता रकमके शून्य दशमलव शून्य ५ प्रतिशत जरिबाना लगैना निर्णय हुइल इन्जिनियर बटैलै ।
पाँच विद्यालयमध्ये धनगढी–९ स्थित भवानी माध्यमिक विद्यालय भवन निर्माण कैना २०७८ कार्तिक ७ मे प्रतिष्ठा–दुनिला–किरण–जेभीसे ठेक्का पाइल रहे । कम्पनीसे २०८० असार १५ मे सक्कु काम सेक्न हिसाबसे १ करोड ५७ लाख ४ हजार ५ रुप्या ९ पैसामे ठेक्का पाइल हो । मने, हालसम ६५ प्रतिशत केल प्रगति हुइल बा । उपमहानगरपालिकासे निर्माण कम्पनीहे अन्तिम चो २ सय दिनके समय थप करटी सम्झौता रकमके शून्य दशमलव शून्य ५ प्रतिशत जरिबाना असुल्न निर्णय करले बा । कम्पनीहुक्रे जरिबानासहित थप हुइल दुई सय दिन भिटरके काम सम्पन्न नइकरलेसे ठेक्का तुरना प्रक्रिया आघे बढैना निर्णय हुइल बा ।
उपमहानगरसे संकटग्रस्त योजनाके सूचीमे तीन ठो सडक योजना फे समावेश करले बा । वडा नम्बर ३ के चटकपुर–राजघाट सडक, वडा नम्बर– ६ के जाई– जाली सडक ओ वडा नम्बर–१२ के चक्र खड्काके घरसे डम्बर साउँदके घरसमके सडक निर्माण कैना २०७७ असार १४ मे ठेक्का सम्झौता हुइल हो ।
एडभेन्चर मल्ल जेभीसे ३ करोड ४७ लाख ८० हजार १९२ रुपैयाँ ३६ पैसामे ठेक्का पाइल चटकपुर– राजघाट सडकके काम हालसम ६० प्रतिशत हुइल बा कलेसे तेडी– मणिलेख जेभीसे २ करोड ८७ लाख ५५ हजार ९७७ रुपैयाँ ६ पैसामे ठेक्का पाइल जाई– जाली सडकके प्रगति ७५ प्रतिशत बा । ओस्टेक करके, तेडी निर्माण सेवासे २ करोड २४ लाख ६४ हजार १५३ रुपैयाँ ५२ पैसामे वडा नम्बर १२ के सडकके ठेक्का पाइलमे हालसम ८० प्रतिशत प्रगति हुइल बा । यी सडक निर्माण सम्पन्न कैना थपल दुई सय दिनमे हरेक निर्माण कम्पनीसे ठेक्का रकमके शून्य दशमलव शून्य ५ प्रतिशत जरिबाना उपमहानगरपालिकाहे बुझाई पर्ना बा । जरिबानासहित थपल दुई सय दिनमेफे काम सम्पन्न नइकरलेसे ठेक्का सम्झौता तुरना उपमहानगर प्रक्रिया आघे बढैना कहल बा ।
यी हिसाबसे सबसे ढेर ठेक्का रकम रहल चटकपुर– राजघाट सडक निर्माणके ठेक्का पाइल एडभेन्चर जेभीसे दैनिक शून्य दशमलव शून्य ५ प्रतिशतके दरलसे औसत १४ हजार जरिबाना तिरे पर्ना बा । अन्य कम्पनीफे यिहे दरमे सम्झौता रकमके शून्य दशमलव शून्य ५ प्रतिशतके हिसाबसे जरिबाना असुल कैना उपमहानगर जनैले बा ।
