कैलालीमे रात ९ बजेपाछे देउसी, भैलो तथा नाचगान करे नैपैना
पहुरा समाचारदाता
धनगढी, २५ कार्तिक । नेपालीहुकनके महान पर्व सुभ डेवारी लगायतके तिहार लग्गे हुइलसंगे कैलालीमे रातके ९ बजेपाछे नाचगान तथा देउसी भैलो खेले नइपैना हुइल बा ।
जिल्ला प्रशासन कार्यालय कैलालीसे सार्वजनिक सूचना जारी करटी सुरक्षाहे ध्यानमे धारके रातके ९ बजेपाछे नाचगान तथा देउसी भैलो खेल्नमे रोक लगाइल हो ।
देउसी, भैलो, नाचगान लगायतके कार्य ढेरमे रात ९ बजेसम केल सभ्य एवं शान्तिपूर्वक कैना अनुरोध बा प्रशासनसे जारी सूचनामे कहल बा,‘रात अबेरसम देउसी भैलो खेलेबेर चोरी डकैती लगायतके घटना हुइना ओरसे उहीसे ध्याने रख्टी अनुरोध करल बा ।’
साथे डेवारीके समयमे बिस्पोटक पदार्थ समेत बिक्री बितरण तथा प्रयोग नइकैना जिल्ला प्रशासन कार्यालय कैलाली अनुरोध करल बा । बिस्पोटक पर्दाथसे मानविय क्षती आगलागी जैसिन घटना हुइना ओरसे उ बिक्री बितरण तथा ओसार पसार ओ प्रयोग नइकैना नइकरैना अनुरोध करल प्रशासनके सूचना अधिकारी शिवराज जोशी बटैलै ।
मादक पदार्थ लगायतके नशालु पदार्थ सेवन करके पर्वके समयमे सार्वजनिक स्थलमे होहल्ला, झैझगडा जैसिन कार्य करके शान्ति सुरक्षाहे असर पर्ना कौनोफे कार्य करे नइपैना बा । उ सूचनामे कहल बा ।
प्रशासनसे देउसी भैलोमे दक्षिणाके लाग रकम तोक्के दक्षिणा डेना दबाब नइडेना ओ देउसी भैलो लगायतके कौनोफे कार्यक्रम करेबारे सार्वजनिक यातायात ओ जनजीवनहे असर पर्ना कौनोफे गतिविधि नइकैना अनुरोध करल बा ।
