नेपालमे अस्थिरता नन्ना विदेश शक्ति लागटैः रावल

पहुरा समाचारदाता
धनगढी, २ अगहन । नेपाली काँग्रेसके केन्द्रिय सदस्य तथा नेता रणबहादुर रावल नेपालमे अस्थिरता नन्ना विदेश शक्ति लग्टी रहल बटैले बटै ।

नेपाली काँग्रेस गैर सरकारी संस्थाके आयोजनामे समन्वय विभाग केन्द्रिय समिति तथा नेपाली काँग्रेस केन्द्रिय सदस्य रणबहादुर रावलसंग परिचयात्मक कार्यक्रममे बोल्टी उहाँ लोकतन्त्र सेक्न विदेशी शक्तिहुकनके चलखेल बढटी रहल बटैलै ।
‘नेपालमे लोकतन्त्रके रक्षक नेपाली काँग्रेस पार्टी हो । अब्बे विदेशी शक्ति काँग्रेस पार्टी सेक्न ओर अग्रसर हुइल बटै उहाँ कहलै । ‘अब्बे टमान बहानामे नयाँ पार्टी तथा विदेशसे लौटके जनप्रतिनिधिमे निर्वाचित व्यक्तिमे विदेशी सहयोग बढल बा ।’
उहाँ अब्बे नेपालमे नकारात्मक मानसिकता बढैना क्रम बहैटी गैल बटैलै । उहाँ कहलै –‘अब्बे समाजमे पार्टीहे गारी कैना, नइमजा डेखाई खोज्न जैसिन आवाज बहैल बा । यैसिक समाज नकारात्मकओर आघे बहैले पार्टीहे खतरा रहल बा । नेपाली काँग्रेसहे चौतर्फी घेराबन्दीमे पर्ना प्रयास हुइटी रहल बा ।

नेता रावल गैरसरकारी संस्था सेवामुलक संस्था रहल ओरसे नेपाली काँग्रेससे आब तयार पर्ना आगामी कार्यक्रममे गैससहे प्राथमिकतामे धारके नीति नन्ना बटैलै । उहाँ कहलै–‘पार्टीके अन्य संगठनसे गैसस संस्था जनताके प्रत्यक्ष सेवामे जुटल बा । यकर लाग आब पार्टीसे नीति बनाके आघे बह्रना जरुरी बा ।’

नेपाली काँग्रेसके केन्द्रिय सदस्य शुशिला मिश्र भट्ट नेपाली काँग्रेसप्रति आस्थावान रहल गैससहुकनहे अभिभावकके अभाव रहल बटैली । उहाँ कहली –“पार्टी गैससके महत्व नइबुझके अभिभावकविहिन बनल आभास हुइल बा । यकर संरक्षणके आवश्यकता रहल बा ।’ उहाँ पार्टीसे यिहीहे अपन नीतिसंग नइजोरटसम समस्या समाधान नइहुइना बटैली ।

कार्यक्रममे सहभागिहुक्रे पार्टीके नेतृत्व, जनप्रतिनिधिसे पार्टीप्रति आस्थावान गैसससे सहयोग नइपैटी रहल पार्टीसे गैससके महत्व नइबुझल बटैले बटै । ‘गैससके छाता संगठन, सामुदायिक वनके छाता संगठनमे अब्बे काँग्रेसप्रति आस्थावान व्यक्तिके सहभागिता नइहो लोकतान्त्रिक गैरसरकारी संस्था कैलालीके अध्यक्ष देवबहादुर धामी कहलै –‘दलित आन्दोलन, मुक्त कम्लहरी, मुक्त कमैया, हलिया प्रथाके अन्त्य लगायत टमान आन्दोलनके अग्रसरता नेपाली काँग्रेसके रहे मने, अब्बे पार्टीसे ओम्ने योग्दान पुर्यइना व्यक्ति पहिचान करे नइसेक्के समस्या हुइल बा । उहाँ पार्टीसे जिम्मेवारी डेके कौनो मूल्याकन नइकरेबेर समस्या हुइल उहाँक कहाई बा ।

लोकतान्त्रिक गैरसरकारी संस्था कैलालीके अध्यक्ष धामीके अध्यक्षतामे हुइल कार्यक्रमके उद्देश्यबारे वेद अवस्थी जानकारी डेहल रही कलेसे कार्यक्रमके सञ्चालन चक्र नेपाली करल रहिट ।