आगलागीसे १८ करोडके क्षति
पहुरा समाचारदाता
धनगढी, २ अगहन । कैलालीके धनगढीमे एक अस्पतालसहित आठ ठो पलसमे आगलागीसे १८ करोडक क्षति हुइल बा ।
जिल्ला प्रहरी कार्यालय, कैलालीके अनुसार गैलक रातके करिब १ बजे ओर विद्युत् सर्ट हुके लागल आगलागीसे दलबहादुर भण्डारीसे सञ्चालन करल भण्डारी जनरल स्टोर (जुत्ताचप्पलके होलसेल गोदाम)सहित सारथी अस्पताल ओ अन्य पसलमे क्षति हुइल बा ।
आगलागीसे सबसे ढेर क्षति भण्डारीके १७ करोड ९७ लाख २० हजार रुप्या बराबरके हुइल प्रहरी जनैले बा । ओस्टेक सारथी अस्पताल प्रालिक पाँच करोड ५० लाख, गरिमा पोलिक्लिनिकके ३० लाख, सुविधा इन्टरप्राइजेजके एक करोड ३० लाख रुप्या, भट्ट सप्लायर्सके ७० लाख, भण्डारी सु सेन्टरके ५० लाख, भण्डारी जनरल स्टोरके चार करोड २५ लाख, मधुमाला कनेक्सनके ६० लाख रुप्या बराबरके क्षति हुइल जिल्ला प्रहरी कार्यालयके प्रहरी नायब उपरीक्षक कुलदीप चन्द जनैलै ।
उहे आगलागीसे सुभिच्छा बेबी सपके ९० लाख, खाद्य व्यापार तथा कम्पनी लिमिटेडके चार करोड रुप्या बराबरके गोदामके भौतिक संरचना ओ गोदाममे कार्यरत कर्मचारीके दुई लाख २० हजार रुप्या बराबरके स्कुटर जरके नष्ट हुइलक प्रहरी नायब उपरीक्षक चन्द बटैलै ।
रातके जुत्ताके गोदामसे लागल आगी अस्पतालमे पुगलपाछे कार्यरत चिकित्सक तथा कर्मचारी पता पाइल सारथी अस्पतालके सञ्चाल बेद प्रकाश जोशी बटैलै । अस्पतालमे आगी पुगलपाछे शुरक्षाकर्मी बोलाके ओइनके सहयोगमे बिरामीनहे सेती अस्पतालमे सारल उहाँ बटैलै ।
विद्युत् तार सर्ट हुक भीषण आगलागी हुइलपाछे नेपाल प्रहरी, नेपाली सेनाके टोली आगी बुटैनामे खटल रहिट । आगी बुटाइक लाग धनगढी उपमहानगरपालिकाके दुई, गोदावरी नगरपालिकाके एक ओ पुनर्वास नगरपालिकाके एक कैके चार ठो दमकल प्रयोग कैगिल रहे ।
