स्थानीय तह कर्मचारी प्रदेश संघर्ष समितिके प्रदेश भेला

सरकारसे हुइल सहमतिहे कार्यान्वयनके माग

पहुरा समाचारदाता
धनगढी, २ अगहन । स्थानीय तह कर्मचारी प्रदेश संघर्ष समितिके सुदूरपश्चिम प्रदेशके प्रदेश भेला शनिच्चरके रोज धनगढीमे सम्पन्न हुइल बा ।

गैल कार्तिक २७ गते स्थानीय तह कर्मचारी केन्द्रिय संघर्ष समिति ओ नेपाल सरकार विच १९ बुँदे सहमतिहे कार्यान्वयन कैना वातावरण निर्माण सहित थप दवाव सिर्जना कैना समितिसे प्रदेश भेलाके आयोजना कैगिल हो ।

नगरपालिका संघके केन्द्रीय सदस्य तथा लम्कीचुहा नगरपालिकाके नगरप्रमु्ख शु्सिला शाहीके वडका पहुनामे हुइल कार्यक्रममे विशिष्ट पहुना गाउँपालिका महासंघ प्रदेश सदस्य तथा कैलारी गाउँपालिका उपाध्यक्ष भगवतीकुमारी चौधरी, स्थानीय तह संघर्ष समिति केन्द्रीय केन्द्रीय अध्यक्ष दिपक गौतम रहल रहिट ।

कार्यक्रममे बोल्टी वडका पहुना शुसिला शाही संघर्ष समितिसे उठाइल माग जायज रहल बटैली । ओस्टेक विशिष्ट पहुना कैलारी गाउँपालिका उपाध्यक्ष भगवतीकुमारी चौधरी कर्मचारी ओ जनप्रतिनिधिके सम्बन्ध नङ ओ मासु बराबर रहल बटैली । कौनो कर्मचारीके मनोबल गिरैलेसे मजासे काम करे नइसेक्ना उहाँ बटैली ।

कार्यक्रममे स्थानीय तह कर्मचारी प्रदेश संघर्ष समितिके सहसंयोजक चेतराज भट्ट कार्यक्रमके उद्देश्यवारे जानकारी डेटी सुदुरपश्चिम प्रदेश निजामती सेवा ऐन ओ स्थानीय सेवा ऐन तत्काल जारी कैनाके साथे जारी हुइना ऐन स्थानीय तह कर्मचारीमंत्री बनैटी प्रशासनिक संघीयताहे थप मजवुत बनैना प्रयोजनार्थ सुदुरपश्चिमके शासक ओ प्रशासक उप्पर दवाव सिर्जना कैना कार्यक्रम आयोजना हुइल बटैलै ।

तिन् तहमे कार्यरत राष्ट्रसेवक कर्मचारीके विचमे समान अधिकार, समान वृति विकास ओ अवसर सुनिश्चितता कैना, संघीय निजामती सेवा ऐनमे स्थानीय सेवामे कार्यरत कर्मचारीके माग ओ मुद्दाहे समावेश करेक लाग देशव्यापी रुपमे रचनात्मक दबाव सिर्जना कैना, स्थानीय तह कर्मचारीके हक अधिकार स्थापनार्थ गठित पालिका, जिल्ला, प्रदेश हुइटी केन्दिय समितिहे थप बल्गर ओ संगठित बनैटी आधिकारिक ट्रेड युनियन दर्ताके लाग आधार विन्दु तयसहित औपचारिक रुपमे ओकर शुभारम्भ कैना उहाँ बटैलै । अइना दिनमे स्थानीय तह कर्मचारीके हकहितके लाग सञ्चालन कैना कार्यक्रमके स्वरुप निर्धारण सहित आगामी कार्यदिशा तय सम्बन्धमे थप रणनीति निर्माण कैना सहसंयोजक भट्ट बटैलै ।

स्थानीय तह कर्मचारी संघर्ष समिति सुदुरपश्चिम प्रदेशके अध्यक्ष दिनेश रावलके अध्यक्षतामे हुइल कार्यक्रममे रोजी सिंह, विरबहादुर नेपाली, मीनबहादुर खडका, गौरीगंगाके उपसचिव हरिश पन्तलगायतसे मन्तव्य व्यक्त करल रहिट । कार्यक्रमके संचालन समितिके सल्लाहकार सदस्य रामचन्द्र जोशी करल रहिट ।

सुदूरपश्चिम प्रदेश भेलामे सक्कु जिल्लाके स्थानीय तह कर्मचारीहुक्रे कार्यक्रम हुइना आघे धनगढीके पार्क मोडसे ¥याली सुरु करके कार्यक्रम स्थल ओम प्यालेस पुगल रहिट ।