थारु समुदायउप्पर अन्याय कैगिलः रेशम थारु
पहुरा समाचारदाता
धनगढी, ३ अगहन । नागरिक उन्मुक्ती पार्टीके संरक्षक रेशम थारु यी देशमे केक्रो उप्पर अन्याय हुइल बा । कलेसे उ थारुन उप्पर अन्याय हुइल बटैले बटै ।
नागरिक उन्मुक्ती पार्टीके अँटवारके रोज कैलारी गाउँपालिकाके हसुलियामे आयोजना करल कार्यकर्ता भेटघाट ओ पार्टी प्रवेश कार्यक्रममे उ बाट बत्वाइल रहिट । उहाँ कहलै, ‘हम्रे कौनो अपराध नइकरले रही । थारु हुइलक कारण थारु जेलमे गैली, अधिकार मंगल्क कारण जेल गैली । कौनो अपराध कैके रेशम जेल नइगैल ।’ मै टे यी देशम सबसे ढेर मत पाइल सांसद रहु,’ उहाँ कहलै, चुनाव जिटके जेल जउइया एक ठो रेशम थारु केल हो ।’ थारु समुदाय सबसे सोझ जाती हुई । समाजमे मिल्के चलुइया जाती ।’
थारु समुदायके पहिचान रिति संस्कृति, परम्परा, गीतबाँस रहलफे उहाँ बटैलै । कार्यक्रममे विशिष्ट पहुना पार्टीक उपाध्यक्ष दामोदर पण्डित, पार्टीक सचिव तथा कैलाली क्षेत्र नम्बर ३ से निर्वाचित प्रतिनिधिसभा सदस्य गंगाराम चौधरी, पार्टीक सहसचिव तथा सुदूरपश्चिम प्रदेशक भुमि व्यवस्था कृषि सहकारी मन्त्री रामेश्वर चौधरी, कैलाली क्षेत्र नम्बर ३ ‘क’ से प्रदेशसभामे निर्वाचित घनश्याम चौधरी, उहे क्षेत्र नम्बरके ‘ख’ प्रदेशसभामे निर्वाचित खुशीराम चौधरीलगायत पार्टीक केन्द्रीय सदस्य, उ पार्टीसे निर्वाचित टमान पालिकाके प्रमुख, वडा अध्यक्ष लगायत पहुनाहुकनके सहभागिता रहल रहिट ।
कार्यक्रमम बोल्टी सुदूरपश्चिम प्रदेशक भुमि व्यवस्था कृषि सहकारी मन्त्री रामेश्वर चौधरी अपने मन्त्री बनलपाछे किसानहुकनके समस्या समाधानके लाग लागि परल बटैलै । उहाँ कहलै, ‘मन्त्रीके सपथ खाइलपाछे मोर पहिल निर्णय छाडा चौपाया व्यवस्था कैना कहल रहु । जहाँ खुला पशु चौपायके समस्या बा । उ ठाउँमे कृृषि मन्त्रालय गौशालाके लाग भौतिक संरचना तयार बा ।’
रासायानिक मलके प्रयोगसे खेती योग्य जमिन विग्रटी गैल कहटी पशु चौपायाके मल प्रयोग कैला उहाँ आग्रह करलै ।
कैलाली क्षेत्र नम्बर ३ ‘क’ से प्रदेशसभामे निर्वाचित घनश्याम चौधरी अपनेहुक्रे जनताके मतके कदर करटी विकासके लाग प्रतिवद्ध रहल बटैल । कार्यकर्ता भेटघाट ओ पार्टी प्रवेश कार्यक्रममे २२३ जाने पार्टी प्रवेश करल नागरिक उन्मुक्ति पार्टीके सुदूरपश्चिम प्रदेश सदस्य भीष्म चौधरी जनैलै ।
कार्यक्रम नागरिक उन्मुक्ति पार्टीके कैलारी गाउँपालिका संयोजक शंकर चौधरीक अध्यक्षताम हुइल रहे । कार्यक्रमके संचालन चन्द्र चौधरी करल रहिट । उ कार्यक्रममे सखिया, मुङग्रहवा, होरी नाँच डेखागिल रहे ।
