धनगढी उपमहानगरसे सामुदायिक विद्यालयके निजीस्रोत शिक्षकहे नगर शिक्षकमे नियुक्ति कैना

पहुरा समाचारदाता
धनगढी, ४ अगहन । धनगढी उपमहानगरपालिकासे सामुदायिक विद्यालयमे कार्यरत निजीस्रोत शिक्षकहुकनहे नगर शिक्षकमे नियुक्ति कैना हुइल बा ।

धनगढी उपमहानगरपालिका ओ निजीस्रोत शिक्षक संघर्ष समितिके बीच सोम्मार हुइल सहमतिमे उपमहानगरसे शिक्षक विज्ञापन खोलके हाल निजीस्रोत शिक्षकहुकनहे परीक्षाके माध्यमसे नगर शिक्षकमे नियुक्त कैना हुइल हो ।
उपमहानगर ओ निजीस्रोत शिक्षक बीच हुइल सहमतिमे धनगढी उपमहानगरपालिकासे नगर शिक्षक वा उ सरहके शिक्षक विज्ञापन करेबेर पहिल चरणमे हाल सामुदायिक विद्यालय के निजी÷ आन्तरिक स्रोतमे कार्यरत सक्कु शिक्षक बीच केल शिक्षक सेवा आयोगके खुला प्रतिस्पर्धात्मक परीक्षाके पाठ्यक्रम बमोजिम विज्ञापन करके पदपूर्ति कैना निर्णय हुइल बा ।

नगर शिक्षकके परीक्षा लेहेबेर निजी स्रोतके शिक्षकहुकनके हकमे उमेर हद नइलग्ना ओ निजीस्रोत शिक्षक मध्येसे पदपूर्ति नइहुइलेसे वा विषयगत योग्यता नइपुगके रिक्त रहल पदमे केल खुला प्रतिस्पर्धात्मक परीक्षासे पदपूर्ति कैना सहमति हुइल शिक्षा महाशाखा प्रमुख नरेन्द्रबहादुर खाती बटैलै । उपमहानगरसे लेना परीक्षामे विद्यालय समायोजन ओ शिक्षक दरबन्दी मिलैना क्रममे सामुदायिक विद्यालयके निजीस्रोतमे कार्यरत शिक्षक विस्थापित हुके सेवा छुटल हुइलेसे ओसिन शिक्षकहुकनहेफे नगर शिक्षकफे प्रतिस्पर्धात्मक परीक्षामे भाग लेहे पैही । मने ६० वर्ष उमेर पुगल शिक्षक भर परीक्षामे भाग लेहे नइपैना सहमति हुइल शिक्षा महाशाखा प्रमुख खाती बटैले ।