सेती अस्पतालमे सिकलसेल एनिमियाके निशुल्क जाँच

पहुरा समाचारदाता
धनगढी, ४ अगहन । सेती प्रादेशिक अस्पतालमे सिकलसेल एनिमियाके निशुल्क जाँच कैना जनैले बा । यिहीसे आघे अस्पतालके आयस्रोत घटल कहटी सिकलसेल एनिमियाके जाँच करलवाफत शुल्क लेटी आइल रहे ।

अस्पतालसे सार्वजनिक सूचना जारी करटी सिकलसेल एनिमिया सम्बन्धी निदानके लाग कैना प्रयोगशाला (इलेक्ट्रोफोरोसिस)के सेवा शुल्क आब नइलेना कहल बा । यी अस्पतालके सामाजिक सेवा इकाई (कोठा नम्बर २४) से निशुल्क सेवा डेना जनाइल बा ।

सिकलसेल एनिमियाके बिरामीसे बाहेर परीक्षण करेबेर महङगा शुल्क तिरे पर्ना बाध्यता हटैना कहटी अस्पतालसे आन्तरिक स्रोत तथा प्रदेश ओ संघ सरकारसे प्राप्त हुइना बजेटसे स्रोत जुटाके निःशुल्क परीक्षण करैना व्यवस्था करल जनैले बा ।
यी आघे अस्पतालसे सिकलसेल परीक्षण करैना बिरामीसे एक हजार शुल्क लेटी आइल रहे ।