मारपिटसे एक युवकके मृत्यु, १४ जाने पक्राउ
पहुरा समाचारदाता
धनगढी, १३ अगहन । कैलालीमे भोजमे गैल एक युवकके निर्घात मारपिटसे मृत्यु हुइल बा । घोडाघोडी नगरपालिका–२ के शिवलाल अधिकारीके २५ वर्षीया छावा मोहन अधिकारीके मारपिटसे मृत्यु हुइल प्रहरी जनैले बा ।
मंगर रात लम्किचुहा नगरपालिका–९ घोराघाट बैठुइया डिल्ली कोइरालाके भोजमे गैल मोहनउपर मारपिट हुइल जिल्ला प्रहरी कार्यालय कैलाली जनैले बा । प्रहरीके अनुसार मारपिटसे घाहिल हुइल ओहकान कपार ओ गोरमे चोट लागल रहे । अचेत अवस्थामे रहल मोहनके उपचारके लाग लालरत्न अस्पतालसे मेडिकल कलेज कोहलपुरमे रिफर करल रहे ।
मने, मेडिकल कलेज अस्पताल कोहलपुरसे उहाँहे टीकापुर अस्पताल रिफर करलमे बुधके सकारे ७ बजे उपचारके क्रममे डाक्टर मृत घोषणा करल रहिट । ओहकान शव पोस्टमार्टमके लाग अस्पतालमे राखल ओ प्रहरी सहायक निरीक्षक ईश्वरीदत्त पाण्डेके कमाण्डमे ३ जाने प्रहरी टोली खटके घटनाके सम्बन्धमे थप अनुसन्धान हुइटी रहल जनैले बा ।
मारपिटमे संलग्न १४ जनहनहे प्रहरी पक्राउ करले बा । पक्राउ परुइयामे लम्कीचुहा नगरपालिका–९ घोराघाट बैठुइया २३ वर्षीय विवेक भुल, २२ वर्षीय विशाल भुल, २२ वर्षीय सन्तोष परियार, २४ वर्षीय गणेश भुल, १५ वर्षीय पिन्टु चौधरी, २२ वर्षीय दिलबहादुर चौधरी ओ २२ वर्षीय पुरन सार्की रहल बाटै ।
ओस्टके २८ बर्षिय विर्ख भुल, वर्ष २४ के सोनु साउद, २३ बर्षिय चक्र कुँवर, २० बर्षिय अकेश कुँवर, २३ बर्षिय निवन केसी, बर्ष २५ के रामलाल चौधरी, वर्ष २४ के विशाल कुमालहे फेन प्रहरी पक्राउ करले बा ।
