कैलारीमे निशुल्क आँखी जाँच शिविर सुरु

पहिल रोज २८६ जाने सेवा लेलैं

पहुरा समाचारदाता
हसुलिया, १३ अगहन । कैलाली जिल्लाके कैलारी गाउँपालिकामे बुधके रोजसे निशुल्क आँखी जाँच शिविर सुरु हुइल बा ।
कैलारी गाउँपालिका ओ धनगढी नेत्रालय प्रालिके आयोजनामे च्यारिटी हेल्थ फाउन्डेसन नेपालके सहयोगमे कैलारी गाउँपालिकाके सक्कु वडा आँखी शिविर हुइटी रहल बा ।

शिविरके उदघाटन वडा नम्बर ३ से वडा अध्यक्ष सन्तराम चौधरीके अध्यक्षता ओ कार्यक्रमके वडका पहुना गाउँपालिका अध्यक्ष राजसमझ चौधरी रहल रहिट । कलेसे विशिष्ट पहुना धनगढी नेत्रालय प्रालिके अध्यक्ष गजेन्द्रबहादुर चन्द रहल रहिट । वडा नम्बर ३ से सुरु हुइल आँखी जाँच शिविरके पहिल रोज २८६ जाने सेवा लेहल कैलारी गाउँपालिका स्वास्थ्य शाखा प्रमुख नरेश चौधरी जानकारी डेलै ।

उहाँ कहलै, प्रत्येक दिन फरक फरक वडामे यी शिविर संचालन हुई । शिविरमे आँखी सम्बन्धी रोगके निःशुल्क स्वास्थ्य परिक्षण, आँखी जाँचके क्रममे छनौट हुके मोतिविन्दु, आँखीमे मास पलाइल, परेलाके शल्यकृया करे पर्ना बिरामीके निःशुल्क शल्यकृया सेवा तथा आवस्यकता अनुसार लग्गेक लेखपढ कैना चश्मा वितरण लगायतके सेवा उपलब्ध कराजैटी बा ।’

बुधके रोज वडा नम्बर ३ के हसुलिया स्वा. चौकीमे हुइल शिविर १४ गते वार्ड न. ४ स्थित के–गाउँ आधारभूत स्वा. केन्द्रमे, १५ गते वडा नम्बर ५ स्थित पवेरा स्वास्थ्य चौकीमे, १७ गते वडा नम्बर ७ स्थित रतनपुर स्वास्थ्य चौकीमे निशुल्क आँखी जाँच शिविर हुइना बा ।

ओस्टेक करके १८ गते वडा नम्बर १ स्थित मनाउँ आधारभूत स्वा. केन्द्रमे, १९ गते वडा नम्बर २ स्थित बसौटी स्वा. चौकीमे, २० गते वडा नम्बर ८ स्थित उदासीपुर प्राथमिक स्वास्थ्य केन्द्रमे, २१ गते वडा नम्बर ९ स्थित गदरिया स्वास्थ्य चौकीमे, २२ गते वडा नम्बर ६ स्थित बनकट्टा आधारभूत स्वास्थ्य केन्द्रमे ओकर पाछे दिपेन्द्र माध्यामिक विद्यालय, हसुलिया (वडा नं १) ओ श्री राष्ट्रिय माध्यामिक विद्यालय, बिचैपुर, उजलीसेमर (वडा नं २) मे अध्ययनरत सक्कु विद्यार्थीहुकनके आँखी जाँच शिविर सञ्चालन कैना स्वास्थ्य शाखा प्रमुख चौधरी बटैलै ।

निशुल्क आँखी जाँच शिविर गाउँपालिका स्थित सक्कु वडा वडामे हुइ जैटी रहल ओरसे भलमन्सा एवं सरोकारवाला मार्फत प्रचार प्रसार एवं आवश्यक समन्वयके लागफे उहाँ अनुरोध करले बटै ।