विभेदपूर्ण लिङ छनोट अन्त्य लाग कार्ययोजना बनैटी प्रदेश सरकार
पहुरा समाचारदाता
धनगढी, १४ अगहन । विभेदपूर्ण लिङ छनोट अन्त्यके लाग सुदूरपश्चिम प्रदेश सरकारसे कार्ययोजना बनाई लागल बा ।
लिङगमे आधारित विभेद अन्त्य कैना उद्देश्यके साथ सरकारसे कार्ययोजना बनाई लागल हो । सामाजिक विकास मन्त्रालयके स्वास्थ्य महाशाखाके प्रमुख नरेन्द्रसिंह कार्की विभेदपूर्ण लैङिक छनोट अन्त्यके लाग अनुमानित लागतसहितके सुदूरपश्चिम प्रदेश सरकारके प्रादेशिक कार्ययोजना (२०८०–०८४) के ड्राफट तयार हुइल कहटी बुधके रोज एक कार्यक्रममे प्रस्तुत करल रहिट ।
फाया नेपालके आयोजना यूएनएफपिएके सहकार्यमे धनगढीमे आयोजित ‘विभेदपूर्ण लिङग छनोट तथा अन्य हानिकारक अभ्यासके लाग सामाजिक अभियन्ता ओ संचारकर्मी संकर करल संवाद कार्यक्रममे सरोकारवालासे लिङग छनोटके आधारमे हुइना विभेद अन्त्य हुई पर्नामे जोड डेहल रहिट ।
लिङ छनोट लैङिक हिंसा रहल ओइने उल्लेख करटी भ्रुण पहिचान करके गर्भपतन करल ओरसे लिङगके आधारमे जनसङ्ख्यामे असन्तुलन देखा परटी रहल यूएनएफपिएके सुदूरपश्चिम प्रदेश प्रमुख कृष्ण भट्टराई बटैलै । भ्रुण पहिचान करके गर्भपतन करटी गैलेससे यिहीसे निकट भविष्यमे भारी समस्या निम्त्याई सेक्ना कहटी उहाँ चिन्ता व्यक्त करलै ।
जन्मसंगे लैङिक विभेद सुरु हुइल महिला अधिकारकर्मी गोमा आचार्यसे बटैली । उहाँ महिला हिंसा न्यूनीकरण करेक लाग महिलाहे आर्थिक रुपमे सशक्त बनैना जरुरी रहल जिकिर करली । उहाँ कहली,“पैतृक सम्पत्तिफे छावा छाईहे बराबर डेहे परठ ।”
छावाके चाहनासे शिक्षित ओ पैसा रहल व्यक्तिसे ढेर जैसिन भ्रुण पहिचान करके गर्भतन करैना करल उहाँ बटैली । दागबत्तीके लाग छावा चाहना समाजके विश्वासके कारण लैङिक रुपमे छावा छाईबिच विभेद हुइटी रहल उहाँ बटैली ।
पैतृक सम्पत्ति खोजेबेर छाई मनै सम्बन्ध गुमाई पर्ना अवस्था रहल महिला अधिकारकर्मी गीता चौधरी बटैली । उहाँ सरकारी अड्डासे लेके राजनीतिक दलसम महिलाके नेतृत्वहे स्वीकार करे नइसेक्के विभेद कैना परिपाटी रहल बटैली ।
लैङिक विभेद न्यूनीकरण करेक लाग विभेद जहाँसे सृजना हुइल उहे उपचार कैना आवश्यक रहल फाया नेपालके जनसम्पर्क तथा सूचना संयोजक धनपति ढुङेल बटैलै । “हम्रे कहाँ समस्या धर्म ओ धार्मिक ग्रन्थसे हुइल बा”, उहाँ कहलै, भगवानके हवाला डेके विभेद कैना डकुमेन्टके विरुद्धमे हम्रे आवाज उठाई सेके परठ ।”
कार्यक्रममे फाया नेपालके कार्यक्रम निर्देशक शेरबहादुर बस्नेत कार्यक्रमके उद्देश्यउप्पर प्रकाश पारल रहिट ।
