बालविवाह रोक्न जुट्लैं विद्यार्थी

पहुरा समाचारदाता
कञ्चनपुर, १९ अगहन । अनौपचारिक क्षेत्र सेवा केन्द्र (इन्सेक) से लालझाडी गाउँपालिका–१, नौैरंगास्थित शारदा राष्ट्रिय माध्यमिक विद्यालयमे गठित बाल अधिकार चेतना समूहके सडक नाटक टोलीसे बालविवाह रोक्न सडक नाटक प्रदर्शन कैगिल बा ।

लैंगिक हिंसा विरुद्धके १६ दिने अभियानके अवसर पारके समाजमे व्याप्त रहल वालविवाहहे न्यूनीकरण कैना उद्देश्यके साथे सडक नाटक तयार पारके लालझाडी गाउँपालिका १ नं. वाडा कार्यालयके प्राङ्गणमे प्रदर्शन कैगिल हो । लालझाडी गाउँपालिकाके कार्यालय, इन्सेक, मानवअधिकार समूह, निड्स नेपाल लगाायतके संघ संस्थाके संयूक्त आयोजनामे लैंगिक हिंसा विरुद्धके १६ दिने अभियानके शुभकामना आदान प्रदान कार्यक्रममे प्रदर्शन कैगिल बा ।

मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल रहे ।

सडक नाटक प्रदर्शन कार्यक्रममे बालबालिकाहुक्रे बालबालिकाहुकनके छोट उमेरमे भोज करेबेर सामाजिक, आर्थिक, शारिरिक तथा व्यक्तित्व विकासमे आई सेक्ना बाधा तथा समस्याके बारेमे जनतेतना जगैना प्रयास करल रहिट । बालबालिकासे प्रदर्शन करल सडक नाटक हेरके धर्म ओ संस्कारके नाममे बालिकाहुकनके छोट उमेरमे भोज कैना, महिनावारीके बेला छाईनहे मन्दिर पठैलेसे देउता रिसैना अनिष्ठ हुइना जैसिन कुसंस्कार अभिनफे समाजमे व्याप्त रहल ओरसे यैसिन खाले नाटकसे जनचेतना जागृत कैना हुइल ओरसे बालबालिकाहु्कनहे अभिन विषय वस्तुमे निखारके समुदायमे जनचेतना फैलैना विद्यालयके प्रधानाध्यापक रोमाकान्त उपाध्याय आग्रह करलै ।

लालझाडी गाउँपालिका महिला बालबालिका तथा सामाजिक विकास शाखाके प्रमुख मानमती भट्ट बालबालिकाहुक्रे प्रस्तुत करल जनचेतनामुलक सडक नाटकसे समाजके यथार्थ चित्रण करल बटैटी प्रहरीके भुमिकामे रहल बालबालिकाहुकनहे कानू्नी सचेतना करैना आवश्यक रहल विचार करलै ।

१५ जाने पात्र रहल सडक नाटकमे बाल क्लवके सदस्य, दुलाह, दुलही, बालबिवाह करैना पण्डित, बालबालिकाके अधिभावक, शिक्षक, संघरीया, प्रहरी लगायतके बालबिवाह न्यूनिकरणमे हुई सेक्ना भुमिका झल्कना खालके कथा प्रस्तुत करल रहे ।

ओस्टेक करके अनौपचारिक क्षेत्र सेवा केन्द्र (इन्सेक) से लालझाडी गाउँपालिका–२ कञ्ज स्थित भानु माध्यमिक विद्यालयमे गठित बाल अधिकार चेतना समूह ओ लालझाडी गाउँपालिका–१ नौरगास्थित शारदा राष्ट्रिय माध्यमिक विद्यालयमे गठित बाल अधिकार चेतना समूहके सडक नाटक टोली लालझाडी गाउँपालिका २ नं. वडा कार्यालयके अंगनामे शुभकामना आदान प्रदानके साथे बालविवाह न्यनिकरण सम्बन्धी सडक नाटक प्रदर्शन करले. बा ।

लालझाँडी गाउँपालिकाके उपाध्यक्ष सपना चौधरीराना बालविवाहके घटना बह्रटी गैल कहटी यी सडक नाटक अब्बेक लाग बहुट सान्दर्भिक रहल बटैली । मानवअधिकार समुहके संयोजक सोमनाथ राना बालबालिकासे प्रस्तुत करल जनचेतनामुलक सडक नाटकसे अभिभावक ओ बालबालिका सचेत हुइना मौका पैना बटैलै । मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल उहाँ बटैलै ।

सडक नाटक प्रदर्शनमे शिक्षक, विद्यार्थी, अभिभावक, मानवअधिकार समुहके सदस्यलगायत सयौंके संख्यामे स्थानीयहुकनके उपस्थिति रहल रहे ।