धनगढी उपमहानगरमे नयाँ प्लटिङ कैना दश धुर जग्गा अनिवार्य
पहुरा समाचारदाता
धनगढी, ६ पुस । धनगढी उपमहानगरपालिकासे जग्गा प्लटिङ सम्बन्धी नयाँ कार्यविधिमे सडकके क्षेत्राधिकार १० मिटर कायम करल बा । उहे कार्यविधि अनुसार नयाँ जग्गा प्लटिङ करेबेर घडेरीके क्षेत्रफल न्यूनतम १० धुर हुई पर्ना उल्लेख बा ।
नियम २१ मे कहल–‘जग्गा प्लटिङ करेबेर घडेरीके चौडाई आठ दशमलब ५ मिटर ओ लम्बाई न्यूनतम २० मिटर हुई पर्ना बा । शहरी क्षेत्रमे घडेरी न्यूनतम सात धुर, कृषि क्षेत्रमे दुई कठ्ठा ओ अन्य क्षेत्रमे न्यूनतम १० धुर हुई पर्ना बा ।’
कार्यविधिमे कहल बा–‘पैत्रिक सम्पत्ति बेचविखन करेबेर ओ अंश बन्डा करेबेरके हकमे कार्यविधिमे रहल कित्ताकाट सम्बन्धी व्यवस्था लागू नइहुई मने, बस्ती विकास मापदण्ड २०७२ तथा उपमहानगरपालिकाके शहरी योजना तथा भवन निर्माण मापदण्ड २०८० बमोजिम डगरके चौडाई लगायतके मापदण्ड पूरा नइहुइल अवस्थामे घर निर्माण कैना इजाजत भर नइडेजाई ।’
यिहे नियमहे टेक्के अब्बे उपमहानगरपालिकाके घर जग्गा नक्सा पास शाखासे नयाँ घर निर्माणके लाग अनुमति डेना रोक करल बा ।
नगर प्रमुख गोपाल हमाल कहलै, डगर एक नम्बर विपदमे परठ । विज्ञसे यहाँ का सल्लाह डेहल कलेसे आब सडक बनाइबेर १० मिटर अनिवार्य हुई परल । जिहीसे दुई ठो गाडी छिरे सेके ।’
एक ठो का हो कलेसे सडक सुरक्षाके लाग सडक पेटी अनिवार्य रहे परठ । हरियालीफे जरुरी रहल बा, नगरप्रमुख हमाल कहलै । व्यवहारिक रुपमे ज्ञान का आइल कलेसे अब्बे २० फिटके डगर बनैठी । उहीहे बह्राई परठ तुरे परठ ।
डगर कहलके आजके लाग केल नइहो,’उहाँ कहलै, ‘जनसंख्या बृद्धि हुइटी गैलेसे ओटरा फरछवार बनैना समय आई सेकी । पहिले कायम हुइल डगरबाहेक आब कायम हुइना डगरमे १० मिटर जरुरी कैगिल बा ।’ नगरप्रमुख हमाल कहलै, ‘एक–दुई कठ्ठा ओ अंशवंण्डामे यी नियम लागु नइहुइ । अंशवण्डाके नाममे व्यवसाय कैना मनसाय हुइलेसे यी नियम लागु हुई ।’ धनगढी उपमहानगरपालिकासे कृषि जमिन ओरैटी जाइटा । कृषि जमिन नइरहलेसे अनुदानफे नइआई, कृषि मिटरफे नइमिली ।
डगरके चौडाई न्यूनतम १० मिटर कायम करल ओरसे नयाँ घर निर्माणके लाग स्थानीयसे दुख पैटी रहल कार्यपालिके सदस्य चक्र विक बटैलै । उहाँ कहलै –‘विशेषत धनगढीमे भोज करैना, छावाछाईहे विद्यालय पढैना, नयाँ व्यवसाय कैना बैंकसे ऋण लग्न, स्वास्थ्यपचार कैना लगायतके लाग जग्गा विक्री वितरण कैना करल बा । मने यी कार्यविधिसे उ सामान्य मनैनहे समस्या डेहल बा ।’
धनगढी उपमहानगरपालिका वडा नम्बर १ के वडा अध्यक्ष सन्तोष मुडभरी कहलै–‘व्यक्तिसे घर निर्माणके लाग विद्युत, नाला तथा ग्राभेल सडक निर्माण करसेकल बटै मने, अब्बे नयाँ कार्यविधि आइलपाछे घर बनैना रोकल बा ।’ उहाँ यी कार्यविधिसे जग्गा व्यवसायीसेफे एक–दुई विगाह जमिन रहल मनैनहे समस्या डेटी रहल बटैलै ।
