मुक्तकमैया, कमलरी, हलिया पुनस्र्थापनाके कार्यविधि हाली पास करबः मन्त्री चौधरी
पहुरा समाचारदाता
धनगढी, ७ पुुस । मुक्तकमैया, कमलरी, हलियाहुकनके हाली पुनस्र्थापना कैके परिचयपत्र वितरण कैना भूमि व्यवस्था कृषि तथा सहकारी मन्त्रालयके माननीय मन्त्री रामेश्वर चौधरी बटैले बटै ।
शुकके रोज धनगढीमे मुक्तकमैया, कमलरी, हलिया पुनस्र्थापना कार्यविधिबारे सुझाव संकलनके लाग भूमि व्यवस्था कृषि तथा सहकारी मन्त्रालयके आयोजनामे कैगिल कार्यक्रममे उहाँ उ बाट बत्वाइल हुइट ।
मुक्तकमैया, कमलरी, हलिया पुनस्र्थापना कार्यविधिबारे गहन छलफल करटी रहल बटी,’ उहाँ कहलै ‘सरोकारवालासे विन छलफल कार्यविधि बनैलेसे जेकर लाग कार्यविधि बनाजाइटा ओइनके पिरमर्का नइसमेटजाई ।’ उहाँ अपने कार्यकालमे मुक्तकमैया, कमलरी, हलिया पुनस्र्थापना कार्यविधि पास करके बाँकी रहल पुनस्र्थापनाकेके काम पुरा कैटी परिचयपत्रफे हाली वितरण कैना बटैलै ।
मन्त्री कहलै, ‘यहाँ सत्यनिरुपण समितिके बाटफे आइटा । काहेकी प्रमाणीकरण कैसिक कैना, प्रमाणीकरणके खाका मस्यौदा बनासेकल बटी । कार्यविधि मस्यौदा समिति अपन काम करटी रहल बा ।’
कार्यविधिहे हाली पास करेक लाग लागल बाटी,’ उहाँ कहलै, ‘उ पास कैना करिब अन्तिम चरणमे पुगल बटी । टमान समिति, मुक्तकमैया, कमलरी, हलियासंग चरणवद्ध छलफल कैगिल । फेरसे मुक्तहलियासे एक चो फेरसे बैठजाई ।’
मन्त्री चौधरी कहलै, ‘मुक्तकमैया, कमलरीहुकनके प्रमाणीकरणके कैना ओटरा समस्या नइहुई काहेकी ओइनठेन टमान आधार बा । उहीहे टेक्के ओइनके पुनस्र्थापना कैसिक कैना कहिके प्रदेश सरकारसे आवासके कसिक मध्यस्तकर्ता कैना, जग्गाके विषयमे टमान बाट आइल बा ।’
जंगल जग्गा नइडेहठ आब हम्रे एक ठो अधिकार सम्पन्न समिति नइबनाइटसम जंगलके विवाद समाधान करे नइसेक्ब, मन्त्री परिषदमे उ बाट उठटी रहल बा । टबमारे अधिकार सम्पन्न समिति गठन कैना ओरसेफे लागल मन्त्री कहलै । जग्गा डेना काम प्रदेश सरकारके नइहो । ओकर लाग संघीय सरकारसे जग्गाके विषयमे पहल कैंबी । ओ स्थानीय सरकारसे जग्गा व्यवस्थापन कैना अनुरोध कैबी मन्त्री कहलै ।
कार्यक्रममे संविधानसभा सदस्य हरिश्रीपाइली सरकारके इच्छा शक्ति रहलेसे पुनस्र्थापनामे कौनो समस्या नइरहल बटैलै । उहाँ, प्रदेश सरकार मठमन्दिरमे करोडौ बजेट विनियोजन करठ मने मानविय विकासमे ध्यान डेहे नइसेकल हो ।’ प्रदेश सरकारहे फागुनसम कार्यविधि पास करके परिचयपत्र बँटना मेरिक आघे बह्रना सुझाव डेलै ।
मुक्तकमैया क्षेत्रमे आवाज उठैटी आइल बालाराम भट्टराई कार्यविधिमे मुक्तकमलरीहुकनफे जग्गा उपलब्ध करैना कहल बटैलै । उहाँ कहलै, और प्रदेशके १४ स्थानीय तहमे कार्यविधि बनाके आघे बह्रल मने कैलाली कञ्चनपुरमे सुरुवाट नइहुइल हो । स्थानीय तह विपद व्यवस्थापनहे ढेर महत्व डेहल सामाजिक मुद्दामे ध्यान नइडेहल उहाँ बटैलै ।
मुक्तकमैया समाजके केन्द्रीय अध्यक्ष पशुपति चौधरी मुक्तकमैया, कमलरी, हलिया पुनस्र्थापनाके काम २०७५ सालके ठन्कल बटैलै । मुक्तकमैया, कमलरी, हलिया पुनस्र्थापना कार्यविधिबारे हाली पास हुइलेसे यम्ने डेख्ना कमी कम्जोरपाछे संशोधन करे सेक्ना बटैलै । उहाँ कहलै, पुनस्र्थापनाके काम एक दुसरहे डेखैटी तीन तहके सरकार अल्मलवाइटी रहल बटैलै ।
कमैया महिला जागरण समाजके विरुनी थारु मुक्तकमैया, कमलरी, हलिया आन्दोलनसे कुछ प्राप्त करल मने कार्यविधि बन्लेसे और राहत मिल्ना बटैली ।
कार्यक्रममे भूमि व्यवस्था कृषि तथा सहकारी मन्त्रालयके नापी अधिकृत धर्मराज ओझा मुक्तकमैया, कमलरी, हलिया पुनस्र्थापना कार्यविधिके मस्यौदा प्रस्तुत ओ सहजीकरण करल रहिट ।
कार्यक्रममे मुक्त कमलरी विकास मञ्चके केन्द्रीय अध्यक्ष हिरा चौधरी मुक्तकमलरीहुक्रे परिचयपत्र नइपाके सेवा सुविधासे बञ्चित हुइटी रहल बटैली । कार्यक्रममे कैलाली कञ्चनपुरके स्थानीय तहके प्रमुख, उपप्रमुख, मुक्तकमैया, मुक्तकमलरी क्षेत्रमे अगुवाई करुइया संघ संस्थाके प्रतिनिधि, मुक्तकमैया अगुवा, टमान मुक्तकमैया बस्तीके मुक्तकमैयाहुकनके सहभागितामे सुझाव संकलन कैगिल बा ।
