खाजा नास्ता व्यवसायमे मजा सम्भावानाः गापा उपाध्यक्ष
पहुरा समाचारदाता
हसुलिया, १० पुस । कैलारी गाउँपालिकाके उपाध्यक्ष भगवतीकुमारी चौधरी खाजा नास्ता व्यवसायमे मजा सम्भावना रहल बटैले बटी ।
कैलारी गाउँपालिका उद्यम विकास शाखाके आयोजनामे यिहे पुस ४ गतेसे १० गतेसम संचालन हुइल खाजा नास्ता तालिम समापन कार्यक्रमके वडका पहुना रहल गाउँपालिका उपाध्यक्ष भगवतीकुमारी चौधरी उ बाट बत्वाइल रहिट । उहाँ कहली, ‘खाजा नास्ता व्यवसायमे मजा सम्भावना बा । एक ठो ठेलामे खाजा नास्ता बनुइया मजासे व्यवसाय करलेसे सरकारी जागिरसे मजा आम्दानी करठै । गाउँपालिकासे बेरोजगार रहलहुकनहे व्यवसायी उद्यमी बनैना सोचसे आघे बह्रल बा ।’
उहाँ कहली, ‘गैल बरसफे ढेर टमान मेरिक तालिम लेके छोट छोट व्यवसाय सुरु करले बटै । यिहीसे आघे गाउँपालिकाके आर्थिक ढकिया डालो बनैना तालिम डेहल ओइनहे बनाइल उ सामाग्रीके बहुट माग हुइल । अपनेहुक्रे मजासे व्यवसाय करी, सीप सिअके उत्पादन करी ओकर बजारीकरण गाउँपालिकासे करी ।’
गाउँपालिका उपाध्यक्षसे महिलाहुकनहे व्यवसाय ओ उद्यमी बनैनामे ढेर महत्व डेहल बटैली । पुरुष मनै बाहेर जाके काम करे सेक्ठै । महिलाके हातमे सीप रहलेसे घरके काम संग्गे घर बैठके काम करके आम्दानीके स्रोत बह्राई सेक्ना उहाँ कहली ।
खाजा नास्ता तालिम समापन कार्यक्रम वडा नम्बर १ वडा अध्यक्ष धोजहरिपाल बोहराके अध्यक्षतामे हुइल रहे कलेसे विशिष्ट पहुना वडा नम्बर ३ वडा अध्यक्ष सन्तराम चौधरी तालिम लेहुइयाहुकनहे सीपके सदुपयोग कैना आग्रह करल रहिट । कार्यक्रमके संचालन कैलारी गाउँपालिका उद्यम विकास शाखाके प्रमुख प्रदीप चौधरी संचालन करल रहिट ।
कार्यक्रममे उ शाखाके सहजकर्ता निर्मला चौधरीफे रहल रहिट । कैलारी गाउँपालिका वडा नम्बर १ ओ ३ के १० जाने तालिममे सहभागी रहिट कलेसे प्रशिक्षण रामसेवक चौधरी डेहल रहिट ।
