भल्मन्सा प्रथाहे संस्थागत कैना आघे बह्रल बटीः मुख्यमन्त्री शाह

पहुरा समाचारदाता
धनगढी, २५ पुस । सुदूरपश्चिम प्रदेश सरकारके मुख्यमन्त्री कमलबहादुर शाह बडघर÷भल्मन्सा प्रथाहे संस्थागत करे परठ कहिके आघे बह्रल बटैले बटै ।

नेपाल आदिवासी जनजाति पत्रकार महासंघ (फोनिज) सुदूरपश्चिमसे विफेक रोज कैलालीके थारु होमस्टे गाउँ भादामे आयोजना करल थारु होमस्टे प्रवद्र्धनमे पत्रकारके भूमिका विषयके अन्तरक्रिया कार्यक्रममे उहाँ यैसिन बटैले रहिट ।
उहाँ कहलै, ‘यी पालिकाके बजेटमे बडघर÷भल्मन्सा प्रथाहे सस्थागत करे परठ कहिके आघे बह्रल बटी । यम्ने अपनहुँक्रे आइ छलफल करी व्यवस्थित ओ वैधानिक रुपमे कैसिक आघे बह्रसेक्जाई, बजेट छुत्यागिल बा, थप बजेट व्यवस्थाफे करेसेक्जाई ।’

होमस्टे विशेष कैख थारु समुदायसंग जोरल उल्लेख कैटी संस्कृति, संस्कार, रीतिरिवाज जोगैनाम होमस्टेक भूमिका महत्वपूर्ण रहलफे मुख्यमन्त्री शाह बटैलै ।

उहाँ राज्य ओ पत्रकारविच विश्वासके वातावरण बने नइसेक्लेसे मुलुक आघे बह्रे नइसेक्ना उल्लेख करटी कहलै, “पत्रकारसे खेल्न भूमिकासे भारी अर्थ राखठ । टबमारे अपनेनके सकारात्मक भूमिकाहे आउर बुलन्द बनाई ।”

धनगढी उपमहानगरपालिकाक–१६ के वडा अध्यक्ष रामलाल चौधरी पर्यटन विकासके लाग सबसे पहिले डगरके विकास हुइना आवश्यक रहल बटैलै । उहाँ सक्कु समस्या समाधानके लाग सरोकारवाला सक्कु निकायसे कैलक प्रतिवद्धता अक्षरस पालना कैना आवश्यक रहल बटैलै ।

होमस्टे (घरबास) महासंघ नेपालक उपाध्यक्ष लक्ष्मीनारायण चौधरी होमस्टेसे गरिबी निवारणम सहयोग कैना ओरसे होमस्टेके विकासमे प्रदेश सरकारसे सहयोग कैना आवश्यक रहल बटैलै । ढेर जाने होमस्टे सञ्चालन करे सेक्लेसेफे राज्यके सहयोग नइहुके लगानी करे नइसेक्के पाछे हट्न करल उहाँक कहाई रहे ।

नेपाल आदिवासी जनजाति पत्रकार महासंघक अध्यक्ष गजुरधन राई थारुहुँक्रनके पहिचान, संस्कृति, संस्कारके बाटहे उजागर कैना यैसिन कार्यक्रमसे महत्वपूर्ण भूमिका निर्वाह कैना बटैलै ।

थारु होमस्टेमे रहल टमान चिजहे ब्राण्डके रुपमे विकास करे सेक्ना हुइलेसेफे राज्यके लगानी शून्य हुके ब्राण्ड बने नइसेकल नेपाल आदिवासी जनजाति पत्रकार महांघके वरिष्ठ उपाध्यक्ष लक्की चौधरी बटैलै । मठ मन्दिरमे राज्यके लगानी डेखलेसेफे थारु समुदायके गाउँ ओ पुस्ताके जीवनसंग जोरल देउथान उपेक्षामे रहल उहाँक कहाई ।

कार्यक्रममे जानकी गाउँपालिकाके अध्यक्ष गणेश चौधरी, थारु कल्याणकारिणी सभा कैलालीके पूर्व उपसभापति माधव चौधरी, थारु विद्यार्थी समाजके ठाकुर करियाप्रधान चौधरी, सुदूरपश्चिम प्रदेश होमस्टे (घरबास) महासंघके अध्यक्ष दिनेश दहित लगायत मन्तव्य व्यक्त करल रहिट । थारु होमस्टेके विकासके लाग राज्यके ध्यान जाई पर्ना, डगरघाट पुलपुलेसा बने पर्ना लगायत उहाँहुकनके कहाई रहे ।

नेपाल आदिवासी जनजाति पत्रकार महासंघ (फोनिज) सुदूरपश्चिम प्रदेश अध्यक्ष रामलखन चौधरीके अध्यक्षतामे हुइल कार्यक्रममे स्वागत मन्तव्य फोनिजके केन्द्रीय सदस्य तथा प्रदेश संयोजक भीम चौधरी ओ संचालन प्रदेश महासचिव उन्नती चौधरी करल रहिट । प्रदेश भेला तथा केन्द्रीय बैठकमे देशभरके आदीवासी जनजाती पत्रकारहुकनहे सहभागिता रहल बा । उ बैठकसे सुदूरपश्चिम प्रदेश घोषणापत्र जारी कैनाफे जनागिल बा ।