उपाधि कैलारी–६ के संघर्ष कृषि फार्महे

पहुरा समाचारदाता
धनगढी, ७ माघ । माघ टिहुवार तथा थारु समुदायके नयाँ वर्ष २६४७ के विशेष अवसरमे हुइल फुलवारी माघ मेला ‘फुटवल पेनाल्टी सुट आउट’ प्रतियोगितामे संघर्ष कृषि फार्म कैलारी–६, बनकटृा पहिल स्थान नन्ना सफल हुइल बा ।

धनगढी उ.म.न.पा. वडा नं. १९ स्थित फूलवारी आधारभुत विद्यालयके प्राङगणमे हुइल प्रतियोगितामे संघर्ष कृषि फार्म कैलारी–६, बनकटृा अपन प्रतिस्पर्धि मलेसियन टिम फुलवारीहे ३ के विरुद्ध ४ गोल कैके विजयी हुइल हो । मलेसियन टिम तीन गोल करल कलेसे संघर्ष कृषि फार्म ४ गोल कैना सफल हुइल संघर्ष कृषि फार्मके टिम लिडर आशिष चौधरी बटैलै ।

पहिल हुइल विजेता टिम नगद १५ हजार पैले बा । कलेसे उपविजेता ८ हजार नगद पुरस्कार पैले बा । संघर्ष कृषि फार्मके टिममे खेलाडी अजय चौधरी, सन्तराम चौधरी, जगदिश चौधरी, अर्जन चौधरी, आशिष चौधरी ओ तिलक चौधरी सहभागि रहिट ।

ओस्टेक करके भलिवलमे धनगढी डेभलर्पस ओ ब्याडमिन्टनमे स्पोर्ट वयर उपाधी जित्न सफल हुइल बा ।
ब्याडमिन्टन प्रतियोगितामे धनगढीके स्पोर्टस् वयर पहिल हुइल बा । फाइनलमे कैलारी गाउँपालिकाके टिमहे पराजित करटी स्पोर्टस वयरसे उपाधी जिटल हो । स्पोर्ट वयरहे शिशिर राना ओ सन्देश पाण्डेके जोडी उपाधि डेहुवाइल हो ।

धनगढी उपमहानगरपालिका वडा नम्बर १९ स्थित फूलवारी आधारभुत विद्यालयके प्रांगणमे माघ १ गतेसे सुरु हुइल फूलवारी माघ मेला तथा भलिबल प्रतियोगितामे रा.पा ट्रेडर्स, धनगढी १९ आई गाउँके टिम दुसरा स्थान हासिल कैना सफल हुइल बा । फाइनलमे धनगढी डेभलोपर्ससंग ३–० के सेटमे पराजित हुइटी डबल रोकायाके रा.पा ट्रेडर्स दुसरा स्थानमे चित्त बुझाइल हो ।
भलिबल प्रतियोगिता पहिल स्थान प्राप्त कैना सफल धनगढी डेभलोपर्स नगद ३५ हजार सहित ट्रफी,प्रमाणपत्र पैले बा । कलेसे दुसरा स्थान हासिल कैना सफल रा.पा टेर्डस नगद २० हजार सहित मेडल,ट्रफी,प्रमाणपत्र पैले बा ।

ओस्टेक ब्याडमिन्टनमे पहिल हुइना सफल स्पोर्टस वयरके टिम नगद १० हजार सहित प्रमाण पत्र पैले बा । कलेसे दुसरा स्थान हासिल कैना सफल कैलारी गाउँपालिकाके टिम नगद रु ५ हजार सहित प्रमाण पत्र पैले बा ।

माघ १ गतेसे ५ गतेसम संचालन हुइल माघ मेलामे टमान सांस्कृतिक कार्यक्रम, होमस्टेमे थारु परिकार धारल रहे । मेलामे रमाइलो मेला, होटेल,व्यापार करके करिब ८० ठो स्टल समेत धारल रहे । फूलवारी माघ मेलाके माघ १ गते कैलाली क्षेत्र नम्बर ५ के प्रतिनिधिसभा सदस्य डिल्लीराज पन्त उदघाटन करल रहिट कलेसे समापन सुदूरपश्चिम खेलकुद परिषदके सदस्य सचिव दिपक बहादुर सिंह करल रहिट ।

समग्रमे यी बर्षके मेला सफलता पूर्वक सम्पन्न हुइल आयोजक थारु संस्कृति टिहुवार मञ्चके अध्यक्ष पर्वत चौधरी बटैलै । उहाँ मेलामे दर्शकके उपस्थिति मजा रहल कहटी मेला भव्यताके साथ सम्पन्न हुइल बटैलै ।