गैसस महासंघके पाँचौ वार्षिक साधारण सभा
पहुरा समाचारदाता
धनगढी, ५ माघ । गैरसरकारी संस्था महासंघ नेपाल सुदूरपश्चिम प्रदेश समितिके पाँचौ वार्षिक साधारण सभा तथा नागरीक समाज संस्थाके कार्यमुलक वातावरणके लाग नागरीक सम्वाद हुूइल बा ।
गैसस महासंघ नेपाल केन्द्रीय समितिके अध्यक्ष रामप्रसाद सुवेदीके वडका पहुनामे हुइल कार्यक्रममे विशिष्ट पहुना केन्द्रीय सचिव भवराज रेग्मी, केन्द्रीय सदस्य सावित्रा घिमिरे, सुदूरपश्चिम प्रदेश इन्चार्ज तथा केन्द्रीय सदस्य टंकप्रसाद ढुंगाना रहल रहिट । प्रदेश अध्यक्ष देवीप्रसाद खनालके अध्यक्षतामे हुइल कार्यक्रमके संचालन प्रदेश समितिके सचिव लोकमान धामी करल रहिट । कार्यक्रममे कोषाध्यक्ष दुर्गा नेपाली संस्थाके आर्थिक प्रगति प्रतिवेदन प्रस्तुत करल रहिट ।
कार्यक्रममे गैसस महासंघके निर्वतमान सचिव धर्मराज पाठक ओ निर्वतमान केन्द्रीय सदस्य तथा सुदूरपश्चिम प्रदेश सहइन्चार्ज सरस्वती खडकाहे सुदूरपश्चिम प्रदेश सभाके सदस्यमे निर्वाचित हुइल ओरसे बधाई तथा सम्मान कैगिल रहे ।
वार्षिक साधारण सभा कार्यक्रममे टमान जिल्ला अध्यक्षसहित प्रदेश समितिके प्रतिनिधिहुकनके सहभागिता रहे ।
ओस्टेक करके गैसस महासंघ नेपालसे कृषि तथा ग्रामीण क्षेत्र ओ ग्रामीण जिविकोपार्जन सम्बन्धी राष्ट्रिय लैङिक मूल्याकन तयार कैना प्रदेशस्तरीय परामर्श कार्यशालाके आयोजना करल रहे । कार्यशालामे समावेशी, लैङिक सम्बन्ध, असमानता ओ विकास प्राथमिकता, प्रदेशके विशिष्टकृत कृषि ओ ग्रामीण अर्थतन्त्रमे लैङिक गतिशीलता, भूमिका ओ चुनौती सम्वन्धमे प्रदेश स्तरीय सरोकारवालाहुकनके सहभागितामे सहभागीहुकनके राय, सुझाव संकलन करल रहे । कार्यक्रममे यमुना घले सहजीकरण करल रहिट ।
