सुदूरपश्चिम प्रदेशमे सत्तारुढ गठबन्धन विजयी
पहुरा समाचारदाता
धनगढी, ११ माघ । राष्ट्रिय सभाके निर्वाचनमे सुदूरपश्चिम प्रदेश सत्ता गठनके उम्मेदवार विजयी हुइल बटै ।
तीन सिटके लाग ६ जानेविच प्रतिस्पर्धा हुईबेर सत्तारुढ गठबन्धनके उम्मेदवार विजयी हुइल हुइट ।
सत्ता गठबन्धनसे अन्यमे नेपाली कांग्रेसके बलदेव बोहरा, अपांग तथा अल्पसंख्यकमे नेपाली कांग्रेसके नारायणदत्त भट्ट ओ महिलाओर माओवादी केन्द्रके रेणु चन्द विजयी हुइल हुइट ।
बलदेव बोहरा ४ हजार ३४७ मत, नारायणदत्त भट्ट ४ हजार ४१९ मत ओ रेणु चन्द चन्द ४ हजार ४५३ मत पाके विजयी हुइल निर्वाचन कार्यालय जनैले बा । बिफेक रोज हुइल मतदानमे स्थानीय तहके १ सय ७६ मध्ये १ सय ७३ जाने ओ प्रदेश सभाके ५२ जाने मतदान करल रहिट ।
धनगढी उपमहानगरपालिकाके मेयर गोपाल हमाल ओ भजनी नगरपालिकाके उपमेयर राजु तिरुवा मतदान नइकरलै । एक जाने बाजुराके स्वामीकार्तिक गाउँपालिकाके उपाध्यक्ष मैना जोशीके भर्खर निधन हुइल रहे । मेयर हमाल स्वतन्त्र उम्मेदवारी डेहे जिटल मेयर हुइट । नाउपाके तिरुवा बिरामी परके मतदानमे अनुपस्थित रही ।
राष्ट्रिय सभामे माओवादी बनल सबसे भारी दल
नेकपा माओवादी केन्द्र राष्ट्रिय सभामे सबसे भारी पार्टी बनल बा । बिफेक रोज १९ सिटके लाग हुइल चुनावमे कांग्रेसके १० जाने निर्वाचित हुइल बटै ।
माओवादी केन्द्रके ५, एकीकृत समाजवादीके दुई तथा जनता समाजवादी पार्टी ओ नेकपा एमालेके १–१ जाने निर्वाचित हुइलै । यी चुनावी परिणामसे राष्ट्रिय सभामे रहल दलीय समीकरण फेरल हो ।
यी आघे राष्ट्रिय सभामे कांग्रेसके १० सांसद रहिट । जेम्ने ४ जाने फागुन २० गते बिदा हुइटी बटै । बाँकी रहल ६ जनहनमे बिफे १० जाने थपलपाछे राष्ट्रिय सभामे कांग्रेस १६ सिटसहित दुसरा भारी दल बने पुगल बा ।
माओवादी केन्द्रके ५ जाने निर्वाचित हुइल बटै । माओवादीसे हाल उपाध्यक्षसहित १५ जाने बटै । ३ जाने फागुन २० मे बिदा हुइटी बटै । थप ५ जाने निर्वाचित हुइल ओरसे राष्ट्रिय सभामे माओवादी केन्द्र १७ सिटसहित सबसे भारी दल हुइल हो ।
हाल एकीकृत समाजवादीके ८ जाने बटै । दुई जाने फागुनसे बिदा हुइबेर बिफे नयाँ दुई जाने निर्वाचित हुइल ओरसे बराबर रहिही ।
जसपाके प्रमिलाकुमारी यादवके कार्यकाल २० फागुनमे ओराइटा । बिफे एक जाने निर्वाचित हुके आइल ओरसे जसपाके राष्ट्रिय सभामे उपस्थिति यथावत बा ।
राष्ट्रपतिसे मनोनित विमला राई पौड्यालके कार्यकाल ओराइटा । यी ठाउँमे जनमोर्चाकके दुर्गा पौडेलहे नन्ना सत्ता गठबन्धनके तयारी बा । यैसिन हुइलेसे राष्ट्रिय सभामे जनमोर्चाके दुई सांसद हुइही ।
लोसपाके फे एक जाने सांसद राष्ट्रिय सभामे बटै । यैसिक उप्पर हाउसमे सात दलके उपस्थिति रहना बा ।
राष्ट्रिय सभा सदस्यके लाग बिहीबार हुइल चुनावमे कोशी प्रदेशसे कांग्रेसके कृष्ण सिटौला ओ एमालेके रुक्मिणी कोइराला निर्वाचित हुइले । मधेश प्रदेशसे कांग्रेसके आनन्दप्रसाद ढुंगाना ओ जसपाके पूजा चौधरी निर्वाचित हुइलै ।
बागमतीसे नेपाली कांग्रेसके जीतजंग बस्नेत ओ विष्णुदेवी पुडासैनी, नेकपा माओवादी केन्द्रके श्रीकृष्ण अधिकारी ओ नेकपा एकीकृत समाजवादीके घनश्याम रिजाल निर्वाचित हुइलै । राष्ट्रिय सभाके लाग गण्डकीमे हुइल ३ सिटके निर्वाचनमा कांग्रेसका किरणबाबु श्रेष्ठ, पदमबहादुर परियार ओ माओवादीके मनरुपा शर्मा निर्वाचित हुइलै ।
लुम्बिनी प्रदेशसे महिलाओर कांग्रेसके विष्णुकुमारी सापकोटा ओ अन्यओर माओवादी केन्द्रके झक्कुप्रसाद सुवेदी निर्वाचित हुइलै ।
कर्णाली प्रदेशसे सत्ता गठबन्धनके तीनु जाने उम्मेदवार निर्वाचित हुइलै । नेकपा एकीकृत समाजवादीके सावित्री मल्ल, माओवादीके विष्णु विक विकल्प ओ कांग्रेसके कृष्णबहादुर रोकाया निर्वाचित हुइलै ।
