धनगढीमे राष्ट्रिय थारु म्युजिक अवार्ड हुइना

पहुरा समाचारदाता
धनगढी, २२ माघ । कैलालीके धनगढीमे राष्ट्रिय थारु म्युजिक अवार्ड २०८० के आयोजना हुइना हुइल बा ।

बर्दगोरिया इभेण्ट एण्ड मार्केटिङ प्रालिके आयोजनामे इहे अइना चैत ३ गते अवार्ड हुइना हुइल हो । राष्ट्रिय थारु म्युजिक अवार्ड २०८० के बारेमे अँटवारके रोज धनगढीमे पत्रकार सम्मेलन कैके जानकारी कराइल बा । नेपालमे पहिलचो थारु चलचित्र, म्युजिक भिडियो ओ थारु लोककला क्षेत्रके कलाकार लोगनहे सम्मान स्वरुप राष्ट्रिय स्तरके अवार्ड आयोजना करेजैटी रहल आयोजक जनैले बा ।

थारु कलाकार लोगनहे समाज, सस्कृति,भाषा ओ कला क्षेत्रके विकासमे जागरुक करैना ओ उत्प्रेरित करैना उद्देश्यसहित अवार्ड आयोजना करे लागल आयोजक बर्दगोरिया इभेण्ट एण्ड मार्केटिङ प्रालिका अध्यक्ष हरेन्द्र चौधरी बटैलैं ।

ओहकान अनुसार म्युजिक अवार्डमे देशभरके सक्कु थारु कलाकार लोगन उत्साहपुर्वक सहभागि करैना लक्ष्य लेहल बा ।जेकर लाग सक्कु प्रदेश ओ जिल्ला कार्यसमिति मार्फत कलाकार मनोनयन प्रक्रियामे सहभागी करैना ओ राष्ट्रिय थारु कलाकार मञ्च केन्द्रिय समिति मार्फत समन्वय कैना जनाइल बा ।

म्युजिक अवार्डमे सर्वोत्कृष्ट आधुनिक गायन (पुरुष), सर्वोत्कृष्ट आधुनिक गायन (महिला), सर्वोत्कृष्ट लोकगीत गायन (पुरुष), सर्वोत्कृष्ट लोकगीत गायन (महिला), सर्वोत्कृष्ट पप गायन (पुरुष), सर्वोत्कृष्ट पप गायन (महिला), सर्वोत्कृष्ट गायन (पुरुष ), सर्वोत्कृष्ट गायन (महिला), सर्वोत्कृष्ट फिल्म स्क्रिप्ट लेखन, सर्वोत्कृष्ट गीत स्क्रिप्ट लेखन, सर्वोत्कृष्ट फिल्म निर्देशक, सर्वोत्कृष्ट म्युजिक भिडियो निर्देशक, सर्वोत्कृष्ट द्वन्द निर्देशक, सर्वोत्कृष्ट संगीतकार, सर्वोत्कृष्ट छायांकार, सर्वोत्कृष्ट दृश्य सम्पादन, सर्वोत्कृष्ट नव प्रतिभा (पुरुष), सर्वोत्कृष्ट नव प्रतिभा (महिला), सर्वोत्कृष्ट एल्बम, सर्वोत्कृष्ट गीत, सर्वोत्कृष्ट मोडल (पुरुष, सर्वोत्कृष्ट मोडल (महिला), सर्वोत्कृष्ट युगल मोडल, सर्वोत्कृष्ट म्युजिक कम्पनी, सर्वोत्कृष्ट कला पत्रकारिता मिलाके २५ विधामे मनोनयन दर्ता करे सेक्ना जनाइल बा ।

अवार्ड कार्यक्रममे सहभागी हुइक लाग माघ २१ गतेसे (ग्लोबल अनलाइन पे) अनलाइन मार्फत मनोनयन दर्ता प्रक्रिया खुल्ला करल आयोजक जनैले बा ।