एनसीसीके विद्यार्थीन अन्तिम तालिमके लाग विदाई
पहुरा समाचारदाता
हसुलिया, २३ भदौ । कैलाली जिल्लाके कैलारी गाउँपालिकास्थित श्री दिपेन्द्र मावि हसुलियासे नेपाली सेनाके विद्यालयमे राष्ट्रिय सेवा दल (एनसीसी) सिनियरमे छनौट हुइल विद्यार्थीनहे अन्तिम तालिमके लाग मंगरके रोज विदाई कैगिल बा ।
दिपेन्द्र माविसे छनौट हुइल ३६ जाने विद्यार्थीनहे नवलपुरके लाग अन्तिम तालिममे सहभागी हुइ जैटी रहल विद्यार्थीनहे कैलारी गाउँपालिका अध्यक्ष राजसमझ चौधरी एक कार्यक्रमके विच टिका लगाके विदाई करल हुइट । उहाँहुक्रे २१ दिनसम नवलपुरमे तालिममे सहभागी रना दिपेन्द्र माविके प्रअ विनोद भट्टराई जनैलै ।
कार्यक्रमके वरका पहुना रहल गाउँपालिका अध्यक्ष राजसमझ चौधरी विद्यार्थीहुकनहे मजाके कैलारीके नाउँ रख्ना आग्रह करलै । उहाँ कहलै, तालिममे जे मजा करी उ विदेशमेफे तालिममे सहभागी हुई पैही, कैलारीसे जे विदेशमे जैना मौका पाई उहीहे गाउँपालिकासे ५० हजार डेजाई ।’
कैलारी गाउँपालिका वडा नम्बर ५ के वडा अध्यक्ष विष्णुप्रसाद चौधरी राष्ट्रिय सेवा दल (एनसीसी) सिनियर यी पालिकमे परल ओरसे सक्कुहुनके विकास कैनामे सहयोग बटैलै ।
एनसीसीसे राष्ट्रिय एकता, सामाजिक एकता, आपसमे सदभाव, आपतविपदमे सहयोग, काल्हके दिनमे उहाँहुकनके सेना ओ प्रहरीमे जागिरके अवसरमे सहयोग पुग्न विद्यालयके प्रअ विनोद भट्टराई बटैलै ।
छनौट हुइल विद्यार्थीनहे नृत्य, संगित, खेलकुद ओ हल्का फायरिङके तालिम डेगैल बा । यी कार्यक्रममे एक बरसमे विद्यालयमे ७९ दिन ओ नवलपरासीके नवलपुरमे २१ दिन अन्तिम रहल प्रअ भट्टराई बटैलै । जौन मंगरके रोज विदाई कैगिल बा ।
विद्यालय व्यवस्थापन समितिके अध्यक्ष विरप्रसाद चौधरीके अध्यक्षतामे हुइल कार्यक्रममे संचालन विद्यालयके प्रअ विनोद भट्टराई करल रहिट । विदाई कार्यक्रममे कैलारी गाउँपालिकाके प्रवक्ता तथा वडा नम्बर ७ के वडा अध्यक्ष दिपेन्द्रबहादुर बम, वडा नम्बर ३ के वडा अध्यक्ष सन्तराम चौधरीलगायत विद्यालय व्यवस्थापन समितिके सदस्य, अभिभावक संघके पदाधिकारी, विद्यालयके शिक्षक, अभिभावनहुकनके सहभागिता रहल रहे ।
कैलालीमे राष्ट्रिय सेवा दल (एनसीसी) सिनियरमे पाँच विद्यालय छनौट हुइल बा । जेम्ने दिपेन्द्र मावि हसुलियाके कक्षा ११ ओ १२ के १८ छात्रा, १८ छात्र करके ३६ जाने रहल बटै ।
